Астанада самбодан Азия және Океания чемпионаты басталды

Бүгін елордадағы «Beeline Arena» спорт кешенінде спорттық және жауынгерлік самбодан ересектер, жастар және жасөспірімдер (ұлдар, қыздар) және мүмкіндігі шектеулі спортшылар арасындағы Азия және Океания  чемпионатының ашылу салтанаты өтті, деп хабарлады Elorda.info.

Ашылу салтанатында Азия самбо одағының басшысы, Бүкіләлемдік самбо федерациясының (FIAS) вице-президенті Аламжон Муллаев, Астана қаласының Дене шынықтыру және спорт басқармасының басшысы Самат Жылқыбаев, Қазақстан спорттық және жауынгерлік самбо федерациясының президенті Айдос Ақжанов қатысып, сөз сөйледі.

Қайырлы күн құрметті жарысқа қатысушылар! Өздеріңізді бүгінгі жарыста көргеніме қуаныштымын. Қазақстанның елордасы Астанаға қош келдіңіздер! 

Астана қаласы әкімдігінің атынан жарысты ұйымдастыруға атсалысқан Мәдениет және спорт министрлігіне және ҚР Самбо федерациясына алғысымды білдіремін. 

Қазақтың оң жамбасына қонған өнердің бірі – күрес. Кәдімгі балуандар күресі. Халқымыздың бағына туған Қажымұқан бабамыздың хас шеберлігі мен батырлығына тәнті болмаған қазақ баласы жоқ шығар. Сол күш атасы салып береген сара  жолды бүгінде талай самбо спортшыларыда абыроймен жалғастырып жүр. 

Осындай ауқымды жарыстың Қазақстан тарихында алғаш рет өтуі біз үшін –үлкен мәртебе. Елімізде самбо спорт түрінің даму қарқыны айтарлықтай нәтижелі.

Бүгінгі байрақты бәсекеге 27 елден 700-дей самбошылар  қатысуда. Қатысушыларға сәттілік, төрешілерге әділдік тілеймін. Шын үздіктер жеңіске жетсін. Спорттық және жауынгерлік самбодан ересектер, жастар және жасөсіпірімдер шеберлер және мүмкіндігі шектеулі спортшылар арасындағы Азия және Океания  чемпионатын ашық деп жариялаймын,- деді Астана қаласының Дене шынықтыру және спорт басқармасының басшысы Самат Жылқыбаев. 

Айта кетейік, бұл сайыстың жеңімпаздары Сауд Арабиясы Әр-Рияд қаласында өтетін дүниежүзілік жекпе-жек ойындары қатысуға жолдама алады. 

Ұйымдастырушылардың айтуынша, чемпионатқа елімізден 24 мүмкіндігі шектеулі спортшы,  126 шебер, ұлттық құрамадан 72 самбошы қатысып жатыр. 

Ал кешкі сессияда жастар жүлде жолында күш сынасып жатыр. Бұл жас санатындағы самбошылар ертең де бозкілемге шығады. Кейін чемпионатты ересектер аяқтайды.

Көрермендер жарысты Qazsport арнасынан  және FIAS youtube каналынан тікелей эфирден тамашалай алады.

Айта кетейік жарыс 11 маусымға дейін жалғасады.