Бокстан ел біріншілігінің жеңімпаздары белгілі болды

Ел біріншілігі сенсацияға толы болды Жүлдеге таласушылар арасында әлем және Азия чемпионатының жүлделерін алған спортшылар қатысты. Жүлдегерлер қатарынан көрінген спортшылар ұлттық құрама қатарына кіріп, 2022 жылғы басты жарыстарға қатысу мүмкіндігіне ие болады.

Ең жеңіл салмақта жастар арасындағы әлем чемпионы Санжар Тәшкенбай чемпион атанды. Финалдық кездесуде Нұр-Сұлтан қаласының боксшысы ринг қожайыны былтырғы Қазақстан чемпионы Даниял Сәбитті жеңді.

51 келі салмақ дәрежесінде тағы бір ринг қожайыны Нұрсұлтан Нуриденов әскерилер арасындағы әлем чемпионатының күміс жүлдегері Алматы облысының өкілі Дамир Әбдіқадірге жол берді.

Келесі салмақта (54 келі) Атырау облысының өкілі, тәжірбиелі Олжас Байниязов Талғат Сырымбетовтен айласын асыра алмады.

57 келі салмақ дәрежесінің финалында Айдос Араповпен 2016 жылғы жастар арасындағы Азия чемпионатының күміс жүлдегері Оразбек Асылқұлов кездесті. Тартысты өткен финалда 3:2 есебімен Ақмола облысынан келген боксшы ел чемпионы атанды.

60 келіде қарағандылық 2016 жылғы жастар арасындағы Азия чемпионы Василий Самчук Шығыс Қазақстаннан келген Әділет Құрметовтен айласын асырып кетті.

Келесі салмақ дәрежесінде Ділмұрат Мижитов 3:2 есебімен 2021 жылғы Азия біріншілігінің күміс жүлдегері Абзал Серікті жеңді.

Абылайхан Жүсіпов өнер көрсететін салмақта (67 келі) Дулат Бекбауов ел чемпионы атанды. Финалдық бәсекеде Жамбыл облысының өкілі Алматы облысынан келген Дархан Дүйсебайды ұтты.

71 келі салмақ дәрежесінде шығысқазақстандық Ермахан Жақпеков павлодарлық Қуан Қуатовтан айласын асыра алмады.

Әлем чемпионатына қатысқан Нұрқанат Райыс павлодарлық Аятулла Тәкежановты ұтып, Қазақстан чемпионы атанды.

Ағайынды Оралбайлар өздерінің мықты екендерін осы чемпионат барысында тағы бір дәлелдеді. Айбек және Нұрбек 80 және 92 келіде ел чемпионы болды. Нұрбек Ақтөбе облысының өкілі Жәнібек Қартбайдан басым түссе, Айбек Абзал Құттыбековті жеңді.

86 келі салмақ дәрежесінде Сағындық Тоғамбай қарсылас шақ келтірмеді. Ақтық сында Алматы қаласынан келген Мәди Әміровті жеңіп, 2021 жылғы Қазақстан чемпионы атанды.

Ең ауыр салмақ дәрежесінде Белградта өткен әлем чемпионатының қатысушысы Нұрлан Сапарбай Аманат Сабырғалиды жеңіп чемпион атанды.