Қасым-Жомарт Тоқаев Финляндия Президентін Ақордада қарсы алды

 Ақордада Мемлекет басшысы Қасым-Жомарт Тоқаев елімізге ресми сапармен келген Финляндия Президенті Александр Стуббты қарсы алды.

Алдымен Қасым-Жомарт Тоқаев пен Александр Стубб бір-біріне ресми делегация мүшелерін таныстырды.

Осыдан кейін мәртебелі мейманның сапарына орай салтанатты рәсімдер залында сап түзеген құрмет қарауылының бастығы Мемлекет басшыларына сәлемдік баянат берді. Президент оркестрі екі елдің мемлекеттік Әнұранын орындады.

Әнұрандарды тыңдап болғаннан кейін Қасым-Жомарт Тоқаев пен Финляндия Президенті кілемше бойымен Қазақстан Республикасының Мемлекеттік Туына қарай жүрді.

Оның алдына келгенде мейман тоқтап, басын сәл иіп, өзінің құрметін білдірді. Сонан соң Мемлекет басшылары құрметті қарауыл сапының бойымен жүрді. Құрметті қарауыл бастығымен қоштасты.

Қазіргі уақытта Мемлекеттер басшылары келіссөз жүргізіп жатыр. Оның барысында екіжақты ынтымақтастықты дамыту перспективасын, сондай-ақ жаһандық және өңірлік күн тәртібіндегі мәселелерді талқылайды.

Бұған дейін Kazinform-ның аналитикалық шолушысы сарапшылармен бірге «Александр Стуббтың ресми сапарында ортақ келісімдер жасала ма?», «Фин инвесторлары үшін қай сала тартымды болуы мүмкін?» деген сауалдарға жауап іздеп көрген еді.