«Самұрық-Энерго» жаңа генерациялау нысандарын салу бойынша 30-дан астам жобаны іске асыруға ниетті

«Самұрық-Энерго» АҚ басқарма төрағасы Қайрат Мақсұтов Үкімет отырысында энергетика саласындағы ірі инвестициялық жобаларды жүзеге асыру бойынша жүргізіліп жатқан жұмыстар туралы айтты.

Ол «Самұрық-Энерго» акционерлік қоғамының инвестициялық жобалар портфелінде 30-дан астам нысан іске асыру көзделгенін, оның 18-і 2035 жылға дейін қуаттылығы 11,6 гигаватт болатын жаңа генерациялау нысандарын салуға бағытталғанын атап өтті.

Компания электр энергиясын өндірудің барлық бағыттары бойынша – газ, көмір, жаңартылатын және гидроэнергетика салаларында кешенді жобаларды іске асырады.

«Бірқатар жобалар Франция, Катар, Қытай, Ресей және Біріккен Араб Әмірліктерінің серіктестерімен бірлесіп жүзеге асырылуда», — деді Қайрат Мақсұтов.

Газ өндіру жобалары бойынша қазіргі уақытта жалпы қуаты 2,2 ГВт болатын 3 жоба іске асырылуда.

Негізгі бағыт – жалпы қуаты 1 080 МВт болатын 3-ші және 4-ші энергия блоктарын орнату арқылы Екібастұз ГРЭС-2 кеңейту.

Көкшетау қаласындағы ЖЭО құрылысы жобасы бойынша жобалау, жабдықтарды жеткізу және құрылыс жұмыстарына қатысты шарттар жасалды.

Семей және Өскемен қалаларындағы ЖЭО жобалары бойынша және осы жобалау алдындағы материалдар негізінде инвестицияның қайтарымын қамтамасыз ету мақсатында құрылыс жүргізуге шарттар жасалды. Осы қалаларда 2029 жылы қуаттылығы тиісінше 360 МВт және 1000 Гкал болатын стансаларды пайдалануға беру жоспарланып отыр.