Абай облысындағы өрттен 400 гектар орман алқабы жанып кеткен

Өрт 1 200 гектар аумақты шарпыған. Оның 800 гектары дала, 400 гектары – орман алқабы. Бұл мәліметтерді бүгін Абай облысының әкімдігі таратты, деп хабарлады Elordainfo.kz. 

Әкімдіктің деректеріне қарағанда, Абай, Шығыс Қазақстан және Павлодар облыстарының Төтенше жағдайлар департаменттері, облыстық Полиция департаменті, «Семей орманы» мен «Ертіс орманы» мекемелерінің қызметкерлері және жергілікті атқарушы органдар жағдайды әлі де бақылауда ұстап отыр. Қарағанды облысы мен Астана қаласынан қосымша күштер мен техника көмекке барды.

Абай облысының әкімі Берік Уәли Төтенше жағдайлар министрлігінің өкілдерімен бірге бүгін таңертең өрттен зардап шеккен Морозов филиалының Соснов орманшылығына тікұшақпен әуеден бақылау жүргізді.

«Тікұшақпен өртенген аумақтарды мұқият қарап шықтық. Өрттің толық тоқтатылғанына көз жеткізіп, елді мекендерге, тұрғындарға қауіпсіз болуын бақылауда ұстаймыз», – деді аймақ басшысы.

Өртті сөндіру жұмыстарына 419 адам, 140-қа жуық техника жұмылдырылды.

Еске салайық, кеше түстен кейін Бесқарағай ауданының Қоянбай ауылының шетінде құрғақ шөп жанып, қатты желдің екпінімен қызыл жалын «Семей орманы» Морозов филиалы аумағына таралған болатын.