Көктемгі каникулда оқушыларды қандай мәдени-спорттық шаралар күтіп тұр

Оқушылардың көктемгі каникул кезеңі 2025 жылдың 21 наурызы мен 2025 жылдың 31 наурызын қоса алғанда он бір күнге созылады, деп хабарлады Elordainfo.kz Оқу-ағарту министрлігінің баспасөз қызметіне сілтеме жасап.

«Мектеп оқушыларының көктемгі демалыстағы бос уақытын тиімді өткізу және жеке тұлғалық қасиеттерін дамыту мақсатында «Біртұтас тәрбие» бағдарламасы аясында іс-шаралар жоспары жасалды. Сондай-ақ 1-4, 5-9 және 10-11 сынып оқушыларына арналған гайдбук әзірленді. Онда әр демалыс күні Наурызнаманың онкүндігімен байланысты және қоғамның маңызды аспектілеріне: отбасылық құндылықтарға, мәдениетке, ұлттық дәстүрлерге, қайырымдылыққа, спортқа мән берілді», – делінген министрліктің хабарламасында. 

Мектептерде каникул күндері бірқатар білім беру, спорттық, мәдени және шығармашылық іс-шаралар өтеді. Олар: 

театр фестивальдері мен қойылымдары; 

шеберлік сабақтары; 

қауіпсіздік сабақтары; 

мұражайларға, ғылыми орталықтарға және тарихи ескерткіштерге танымдық экскурсиялар; 

спорттық ойындар; 

қайырымдылық акциялары және басқа да шаралар. 

«Ең бастысы – балалардың қауіпсіздігін қамтамасыз ету. Осы мақсатта ата-аналармен бірге жол-көлік жарақаттарының алдын алуға, мектептің ішкі тәртібін сақтауға, балалардың көшедегі қауіпсіздігіне, үйдегі өрт қауіпсіздігі және киберқауіпсіздікке ерекше назар аударылады», – делінген министрліктің хабарламасында.