Астанада мәдениет саласындағы әйелдерді қолдау орталығы ашылды

13 ақпан, 2025
Ернұр Қайнар Ернұр Қайнар
Астанада мәдениет саласындағы әйелдерді қолдау орталығы ашылды
Фото: дереккөз

Астанада ART QALQA мәдениет саласындағы әйелдерді қолдау орталығының тұсаукесері өтті, деп хабарлады Elordainfo.kz.  

Орталықтың алғашқы іс-шарасы – суретші Әсемгүл Жанахметованың «Әлем – әйел жанарында» атты көрмесі болды. Суретші туындылары қазақтың дәстүрлі мәдениеті мен заманауи сурет өнері элементтерін тоғыстырады.

Іс-шара шығармашылық саласындағы әйелдерді – жазушыларды, суретшілерді, музыканттарды, әртістерді және бизнес, үкімет, Парламент, елшіліктер мен республикалық, халықаралық ұйым өкілдерін бір шаңырақ астына жинады.

Қазақстандағы Ұлыбритания елшісі Кэти Лич қыздардың бастамасына қолдау білдіру үшін арнайы келді. Ол Art Qalqa жұмысы мен жоспарлары жайлы орталық өкілдерімен, суретшімен оның шығармашылығы жайлы пікір алмасты.

Кешке қатысқан Түркия және АҚШ елшілік өкілдері де әйелдер шығармашылығын қолдайтын орталықтың құрылуына қатысты жылы лебіздерін білдірді. Түркия елшілігінің өкілдері екі ел арасында алда көркемсурет бойынша өтетін шаралардан хабардар етті.

Сондай-ақ Қазақстан іскер әйелдер қауымдастығы, Қазақстан халықтары Ассамблеясы жанындағы Республикалық Аналар кеңесі өкілдері де шығармашылық әйелдерді қолдау бойынша пікірлерін ортаға салды.