Түркістан облысында 4 жыл бұрын жоғалған қыз табылды

Түркістан облысында полиция 4 жыл бұрын жоғалған қызды іздеп тапты, деп хабарлады Elordainfo.kz.

Төлеби аудандық полициясы осыдан 4 жыл бұрын із-түзсіз жоғалған қызды үздіксіз іздеу нәтижесінде аман-есен тауып, анасымен қауыштырды.

2021 жылы жазда жергілікті тұрғын полицияға 16 жастағы қызы жоғалғанын айтып, арызданған. Бірнеше жыл өтсе де тұрғынның арызы негізінде іздеу жалғасып, нәтижесінде 2025 жылы қаңтарда бір-бірінен көз жазып қалған анасы мен қызы кездесті. 

«Қызымнан хабарсыз қалып, нендей жағдайда екенін біле алмай жүрген күндер артта қалды. Көп рақмет. Арасында өздеріңізге де сенімсіздік білдірген едім, бүгін міне үмітім ақталып отыр. Сіздерге алғысым шексіз», - деді қыздың анасы.

Полиция қызды Алматы қаласындағы тамақтану орындарының бірінде жұмыс істеп жүрген жерінен тапқан. Бүгінде қыздың осынша уақыт қайда, не себеппен хабарсыз кеткенін анықтау шаралары жүргізіліп жатыр. Полицейлер осы жайт бойынша мұқият тергеу жүргізіп, оқиғаның толық мән-жайын анықтайды.