Жеңіс Қасымбек астаналықтар мен қала қонақтарын Жаңа жыл мерекесімен құттықтады

Астана қаласының әкімі Жеңіс Қасымбек астаналықтар мен қала қонақтарын Жаңа жыл мерекесімен құттықтады, деп хабарлады Elordainfo.kz.

«Құрметті Астана қаласының тұрғындары мен қонақтары!

Сіздерді Жаңа жыл мерекесімен шын жүректен құттықтаймын! 2025 жылы армандарыңыз орындалып, үйлеріңізде бақыт пен береке орнап, махаббат пен татулық салтанат құрсын!

Өтіп бара жатқан жыл қаламыз үшін өзгеріске толы жыл болды. Біз астанамызды заманауи, қазіргіден де ыңғайлы әрі әрқайсыңызға жайлырақ ету үшін еңбек еттік. Әлеуметтік нысандар мен инфрақұрылымдарды салуға, жаңа қоғамдық кеңістіктер ашуға, қоршаған ортаны жақсартуға және азаматтардың өмір сүру сапасын арттыруға ерекше көңіл бөлінді.

Алдымызда әлі де көп міндет тұр. Біз Астананы өмір сүруге қолайлы, әрбір адам өз әлеуетін жүзеге асыруға мүмкіндік беретін, сол сияқты жұмыс істеуге және демалуға ыңғайлы қалаға айналдыруға ұмтыламыз. Осының бәрін сіздердің сенімдеріңіздің, қолдауларыңыз бен еңбектеріңіздің арқасында жасап жатырмыз. Қаламыздың өміріне белсене атсалысып, бірге алға басуға септігін тигізетін бастамаларыңыз бен ұсыныстарыңызға алғысым шексіз!

2025 жыл оң өзгерістерге толы болсын! Сіздерге зор денсаулық, қуаныш, отбасыларыңызға амандық тілеймін! Мереке құтты болсын! Жаңа жыл құтты болсын!» - делінген құттықтауда.