«SAMRUK BALA CUP 2023»: Елорданың шайбалы хоккей командасы чемпион атанды

«Самұрық-Қазына» қорының қолдауымен өткен «SAMRUK BALA CUP 2023» балалар командалары арасындағы республикалық турнир мәресіне жетті, деп хабарлады Elorda.info⁠ елорда әкімдігінің ресми сайтына сілтеме жасап.

Спорт шарасы 11-14 желтоқсан аралығында Астанада 300 баланың қатысуымен өтіп, Қазақстан тарихындағы ең ауқымды балалар хоккей жарыстарының біріне айналды. 8 өңірден 24 команда, сондай-ақ Өзбекстан мен Қырғызстан елдерінен келген командалар өнер көрсетті.

Төрт күннің қорытындысы бойынша елордалық «Астана-1» командасы чемпион атанды. Күміс медаль «Барыс-1» тобы иеленсе, турнирдің қола жүлдегері «Барыс-2» командасына бұйырды.

Турнирдің барлық қатысушылары мен жеңімпаздары медальдармен және кубоктармен марапатталды.

Бұл турнир «Самұрық-Қазына» АҚ қайырымдылық қызметінің бірыңғай операторы – «Samruk-Kazyna Trust» қоры қаржыландыратын «Altyn shaibaly» жобасы аясындағы алғашқы балалар хоккей жарысы. 2024 жылы Қазақстанның түкпір-түкпірінен ауыл балаларының командалары арасындағы екі ауқымды балалар хоккей жарысы ұйымдастыру жоспарда бар», – дейді елордалық шайбалы хоккей федерациясының басшысы Рустам Сержанұлы.