Елордалық мектепте аутизмі бар балалармен жұмыс істеу тәсілдері талқыланды

Бүгін елордадағы Өзбекәлі Жәнібеков атындағы №11 мектеп-лицейінде 2 сәуір - Дүниежүзілік аутизм туралы ақпарат тарату күніне орай дөңгелек үстел өтті, деп хабарлады Elordainfo.kz.

Аутизмі бар балалармен жұмыс барысындағы кешенді тәсілдер тақырыбында өткен жиынға қалалық мәслихат депутаттары Кендебай Адамбеков, Мәдина Әжікенова және Асқар Смағұлов,  Қазақстанның халық әртісі, композитор Майра Ілиясова, Астана қаласы Әдістемелік орталығының арнайы және инклюзивті білім беру бөлімінің басшысы Салтанат Қасымқанова, «Болашақ» корпоративтік қорының координаторы Самал Әлбілекова, мектеп ұжымы мен ата-аналар қатысты. 

Астана қаласы мәслихатының депутаты Кендебай Адамбековтің айтуынша, елордадағы білім беру ұйымдарында аутизмі бар балаларға арнайы жағдай жасау бойынша жүйелі шаралар атқарылып келеді.

«Астана қаласының мәслихаты елорда әкімдігі, әсіресе Білім басқармасымен бірлесіп, аутистік спектр бұзылыстары бар балаларға арнап нақты шаралар орындап жатыр. Қазіргі таңда елордада психологиялық-медициналық-педагогикалық консультацияның статистикасына сәйкес қарым-қатынас пен әлеуметтік өзара әрекеттесуі бұзылыстары бар 18 жасқа дейінгі 3609 бала тіркелген. Елордада аутизмі бар балаларға физикалық кедергісіз қолжетімділікті ұйымдастыру, сонымен қатар бейімделген бағдарлама құру бойынша үнемі әдістемелік қолдау көрсетіліп тұрады», - деді мәслихат депутаты.

Кендебай Сарыбайұлының мәліметінше, елордада 64 инклюзияны қолдау кабинеті жұмыс істейді. 

«Елордада 64 инклюзияны қолдау кабинеті және 4 психологиялық-педагогикалық түзету кабинеті, 2 оңалту орталығы және «Асыл мирас» аутизмі бар балаларды қолдау орталығы жұмыс істейді. Бір жылдың ішінде 10 мыңға жуық балаға психологиялық-педагогикалық түзету көмегі көрсетіледі. Сонымен қатар 2023-2024 оқу жылынан бастап ерекше білім беру қажеттілігі бар оқушыларды кәсіптік бағдарлау мақсатында «Менің болашақ мамандығым» атты эксперименттік жоба қаланың әр ауданы бойынша 8 мектепте ұйымдастырылды. Ол үйірме түрінде жүргізіліп, 69 баланы қамтыды және оң нәтижесін көрсетті.  Қазіргі таңда жоба жалғасуда. Жоғарыдағы аталған шараларға мүдделі басқармалардың сұранысы бойынша қажетті қаржы мәслихат тарапынан толықтай бөлінуде», - деді Кендебай Адамбеков.

Өзбекәлі Жәнібеков атындағы №11 мектеп-лицейінің директоры Зәмзәгүл Кәмешева білім ордасында инклюзияны қолдау кабинеті 2022 жылы ашылғанын атап өтті.

«Бүгінгі таңда біздің мектебімізде 27 ерекше білімді қажет ететін оқушы екі ауысымда білім алуда. Оқушылардың ПМПК қорытындысы бойынша диагноздары әртүрлі. Дей тұрғанмен қорытынды көрсеткішіне байланысты барлық 27 оқушының әрқайсысы педагог-ассистенттің сүйемелдеуімен жүреді. Айта кетерлігі, біздің мектебімізде инклюзияны қолдау кабинеті 2022 жылы «Болашақ» корпоративтік қорының қолдауымен ашылған. Кабинет арнайы құрал-жабдықтармен қамтамасыз етілген», - дейді мектеп директоры Зәмзәгүл Кәмешева. 

Қазақстанның халық әртісі, композитор Майра Ілиясова ерекше баланы тәрбиелеп отырған ата-аналарға алғыс білдірді.

«Мен үшін осы жердегі барлық бала бірдей. Өнер жолында да ән айтатын қабілетті ерекше балалар бар. Осы орайда осындай балаларды тәрбиелеп, шыдамдылық танытып жүрген ата-аналарға алғыс айтқым келеді. Әлі қызықты өмір алда. Осы балаларыңыздың қызығын көресіздер», - деді Майра Ілиясова.

Жиын барысында педагог-ассистенттің ерекше баланың өміріндегі рөлі және ерекше білімді қажет ететін баланы тәрбиелеудегі отбасындағы ата-ананың рөлі туралы айтылды. Сонымен қатар педагог-ассистенттер мен оқушылар өз өнерлерін көрсетті.