Іздеу 
KZ
Астанада «Tanym CUP» республикалық пікірсайыс турнирі өтті
Сабина Кәкімжан
Астана қаласы әкімдігінің қолдауымен «Діндерді зерттеу орталығы» жастар арасында «Tanym CUP» республикалық пікірсайыс турнирін өткізді, деп хабарлады Elordainfo.kz қалалық әкімдіктің ресми сайтына сілтеме жасап.
Іс-шараның негізгі мақсаты – жастар арасында дін тақырыбындағы өзекті мәселелерді анықтап, діни экстремизммен күресу және сыни ойлау дағдысын қалыптастыру арқылы дін саласына деген қызығушылығы мен жанашырлығын арттыру, сондай-ақ әлеуметтік желіде интеллектуалды жастар ойынымен зайырлылық қағидаттарын насихаттау.
Пікірсайыс турнирі «Назарбаев Университетінде» қазақ, орыс тілдерінде өтті. Ал іріктеу кезеңі мен плей-офф кезеңінен тұрды. Іріктеу кезеңі «Британиялық Парламенттік Формат (БПФ)» форматында өтетін төрт іріктеу раундынан, плей-офф кезеңі «Америкалық Парламенттік Формат (АПФ)» форматында өтті.
Турнирге еліміз бойынша 18-30 жас аралығындағы 96 адам, оның ішінде 60 тіркелуші өзге аймақтан қатысты. Қатысушы командалар саны: қазақ тіліндегі лига – 32, орыс тіліндегі лига – 16. Сонымен қатар бұл турнирде ең жоғары ұпай жинаған екі спикер арасында финалдық ойын өткізіліп, турнирдің «Үздік спикері» анықталды.
Турнир қорытындысы бойынша қазақ лигасында 1-орынды «Кешіріңдерші» командасы (Айдана Жарылқасын, Даулет Нұркен), 2-орынды «501-легион» (Шыңғыс Теңсізбек, Аслан Төрехан), алса, 3-орынды «who's done A»(Айбике Жағыпарова, Элина Амурлаева) фракциясы иеленді. Ал «Үздік спикер» аталымын Алтынай Заманбекова иеленді.
Орыс тілді лиганың қорытындысы бойынша 1-орынды «Жылап ал, айналайын» (Әйгерім Айбасова, Димаш Сағатбеков), 2-орынды «Консервативный Кальянс» (Нұрлан Мұратбек, Аслан Әбілқайыров) командасы иеленді. 3-орынды «Путь дебатера - это бан» (Артем Посвежинский, Дмитрий Беседин) командасы иеленді. Орыс тілді лиганың үздік спикері Аслан Әбілқайыров атанды.
Турнирдің жалпы жүлде қоры 2 140 000 теңгені құрады. Оның ішінде I орын иегерлеріне – 500 000 теңге, II орынға – 300 000 теңге, III орынға – 200 000 теңге, турнирдің үздік спикерлерлеріне – 70 000 теңгеден берілді.
