Астанада шизофренияға арналған сайт пен кітаптың тұсауы кесілді

Елордада  Дүниежүзілік менталдық саулық күні қарсаңында Niettes алаңында шизофренияға арналған жаңа веб-сайттың, сондай-ақ қазақ тіліне аударылған «Шизофренияның жалпы күйі: жақындарыңызға арналған кітап» кітабының тұсаукесері өтті, деп хабарлады Elordainfo.kz.

Бұл шара шизофрения диагнозы бар адамдарға және олардың жақындарына қолдау көрсетуге бағытталған.

Денсаулық сақтау министрлігінің мәліметінше, биыл  Қазақстанда бұл аурумен 40 мыңнан астам адам тіркелген.

Кітап ең алдымен ауыр дертке шалдыққан науқастардың  жақын адамдарына арналған.

Бұл оқырмандарға аурудың сипаттамаларын жақсырақ түсінуге ғана емес, сонымен қатар олардың қолдау мен қамқорлық көрсететін тұлға ретіндегі рөлін түсінуге көмектеседі. Кітапта жақын адамға қалай көмектесу керектігі, күтімнің эмоционалдық және физикалық қиындықтарымен қалай күресуге болатыны туралы маңызды білімдер және ішкі дайындықпен және жауапкершілікті сезіне отырып, өз рөліңізді қабылдауға арналған кеңестер бар. Бұл жолсерік қиын-қыстау кезеңде практикалық кеңестер мен моральдық қолдау көрсететін адал серік болады.

Кітап авторлары – бұл салада тәжірибесі бар психотерапевтер мен психиатрлар. Олар –  Питер Фалькай, Янош Кальман, Фидес София Хеймкес, Золтан Сарканы.

Жаңа веб-сайтта шизофрения, аурудың кезеңдері, оның диагностикасы мен емі туралы екі тілде толық ақпарат берілген. Сондай-ақ жалған деректерді нақты деректерден ажыратуға мүмкіндік беретін «Мифтер мен шындық» бөлімі бар. Сонымен қатар, оқырмандар қайдан қолдау алуға болады, туыстарының ауруы туралы балалармен қалай сөйлесуге болады, пациент дәрі-дәрмек пен медициналық көмек алудан бас тартқан жағдайда не істеу керек және т.б. сұрақтарға жауап таба алады.

«Шизофрения сияқты ауыр аурулар жиі мифтер мен жалған ақпараттармен бірге жүреді. Биыл мамыр айында біз сауалнама жүргіздік.  Соның нәтижесінде қазақ тіліндегі ақпараттың аз екенін анықтадық. Нәтижесінде  сенімді ақпарат көзі ретінде psy-health.kz-сайтын ашуды жөн көрдік. Бұл веб-сайт шизофрения туралы түсінікті өзгертуге, мифтерді жоюға және ауру жайлы толығырақ ақпарат білуге мүмкіндік береді», - дейді Gedeon Richter Kazakhstan компаниясының PR менеджері Динара Бірмағанбетова.

Отырыс барысында  Астана қалалық Қоғамдық денсаулық сақтау басқармасының штаттан тыс бас психиатры Елена Полиенко шизофрения үкім емес екендігін айтты.

«Шизофрения –үкім емес. Бұл диагнозбен сіз қалыпты өмір сүре аласыз. Қазір фармацевтика әлдеқайда алға басып, адамдарға аурумен күресуге және жоғары сапалы ремиссияға және қайта әлеуметтенуге қол жеткізу мүмкіндігімен толыққанды өмір сүруге көмектесетін тиімді препараттарды ұсынады. Өкінішке орай, көптеген адамдар диагнозды қабылдауға қорқады, өйткені оларда ақпарат жеткіліксіз », - деді ол.

Ал кітапты аудару және веб-сайтты құру Gedeon Richter Kazakhstan жүзеге асырған «Рахмет, дәрігер» әлеуметтік-танымдық жобасы аясында жүзеге асырылды.

«Gedeon Richter компаниясы бірнеше жылдан бері Қазақстанда шизофрениямен ауыратын адамдарға қолдау көрсетіп келеді. Кітапты мемлекеттік тілге аударып, арнайы веб-сайтты ашу – осы диагнозбен ауыратын науқастарға толерантты және құрметпен қарауды насихаттаудағы маңызды қадам. Компания тек медициналық көмек көрсетіп қана қоймай, ауруды дестигматизациялауға және хабардарлықты арттыруға көмектесу арқылы қоғамның көзқарасын өзгертуге тырысады. Бұл жоба пациенттер мен олардың жақындарын қолдауға, сондай-ақ анағұрлым инклюзивті және түсіністікті қоғам құруға бағытталған кешенді күш-жігердің бір бөлігі», - деді Gedeon Richter Kazakhstan бас директоры Павел Хегай.

Психикалық денсаулық сақтау амбулаториялық қызметінің меңгерушісі Алмагүл Айтжанова көпшілікке шизофрения туралы көбірек ақпарат беру қажеттігін айтты.

«Біз қоғам ретінде бұл ауруды дестигматизациялауымыз керек. Ал мұндай бастамалардың бұған көп көмегі тиері сөзсіз. Біз адамдарды стереотиптерден арылта отырып, шизофрения туралы ақпараттандыруымыз керек. Осындай сапалы әрі өзекті материалдар қазақ тілінде шыға бастағанына өте қуаныштымын», - деді А.Айтжанова.