Астанада «Мектепке жол» акциясы өтіп жатыр

Бүгін елордалық «Аймақтау» сауда үйі маңында мектеп жәрмеңкесі басталды, деп хабарлады Elorda.info.

Жыл сайын «Мектепке жол» акциясы аясында өткізілетін дәстүрлі жәрмеңкеде кеңсе тауарлары мен мектеп формасын қолайлы бағамен сатып алуға болады. Ұйымдастырушылардың айтуынша, мұндағы тауарлар базар бағасынан 10 пайызға төмен.

«Бүгін міне, 1 тамыздан 31 тамызға дейінгі аралықта өтетін «Мектепке жол» республикалық жәрмеңкесі басталды. Өткен жылғы іс-шара аясында 8 мыңнан аса бала мектепке дайындық жасаған болса, биыл 8,5 мың баланы қамту жоспарланып отыр. «Мектепке жол» акциясы, негізінен, демеушілердің және меценаттардың қаражаты есебінен жүзеге асырылады.

Бұдан бөлек, біздің жалпыға бірдей міндетті біліммен қамту бағдарламасы аясында жұмыстар жүргізіліп жатыр. Соның нәтижесінде өткен жылы халықтың әлеуметтік осал топтарына жататын 14 040 балаға аталған бағдарлама аясында көмек көрсетілсе, биыл 14 500 баланы қамтуды жоспарлап отырмыз. Халықтың әлеуметтік осал топтары санаттарына әлеуметтік көмек алатын отбасы балалары, отбасының жан басына шаққандағы табысы ең төменгі күнкөріс деңгейінен төмен, ата-анасының қамқорлығынсыз қалған, төтенше жағдайларға тап болған балалар және басқалары жатады.

Егер отбасы аталған санаттарға жататын болса, онда балалардың ата-аналары мектепке барып, растайтын құжаттарды ұсынуы керек.

Қазіргі уақытта мектептердің әлеуметтік педагогтары білім алушылардың жаңа жиынтығын ескере отырып, мұқтаж балалардың тізімін қалыптастыруда.

2024-2025 оқу жылында материалдық көмектің мөлшері бір балаға 43 407 теңгені құрады» , - деді Астана қаласы Білім басқармасының бас маманы Құттымұрат Шамшиев.

Мектеп жәрмеңкесіне келген қала тұрғыны Ғалия Абайқызы мұндай арзан жәрмеңкелердің ұйымдастырылып тұрғаны тиімді екенін айтты.

«Мектеп құралдарының бағасын қарап шықтым. Түрлі баға сегменті бар екен. Қарапайым адамға қолжетімді. Баға сапасына сай. Мәселен, мектеп сөмкелері 5-10 мың теңге аралығында. Сөмкені оқушы бірнеше жыл ұстайтынын ескерсек, бағасына тұрады деп есептеймін», - дейді Ғалия Абайқызы.

«Аймақтау» сауда маңында орналасқан мектеп жәрмеңкесі күнделікті таңертеңгі сағат 09.00-ден кешкі сағат 20.00 аралығында 5 қыркүйекке дейін жұмыс істейді.

Айта кетейік, мұндай мектеп жәрмеңкелері қаладағы басқа да ірі сауда үйлерінде ұйымдастырылмақ.