Астананың Алматы ауданында биыл қандай жұмыстар атқарылды

Астана халқының саны жыл сайын артып, шаһарда құрылыс пен инфрақұрылым да соған сай қарқынды дамуда. Ал келелі істердің келісті жүзеге асуына қаланың Алматы, Сарыарқа, Есіл, Байқоңыр және Нұра аудандары жұмған жұдырықтай атсалысып келеді. Қаланың даму динамикасына байланысты биыл Сарайшық деп аталатын жаңа алтыншы аудан да құрылған болатын. Elordainfo.kz осы аудандарда жыл бойы атқарылған жұмыстарды кезек-кезегімен жариялап тұрмақ. Сонымен, Алматы ауданында биыл қандай жұмыстар атқарылды?

Алматы ауданында барлығы 565 аула бар, осыған дейін оның 155-і жөндеуді қажет еткен болатын. Биыл олардың ішіндегі 50 аула абаттандырылды. Бұлардың 32-сіне ағымдағы жөндеу жүргізілсе, 18-і «Халық қатысатын бюджет» бағдарламасы арқылы жаңғыртылды.

Аумақта саябақтар мен гүлзарларды күтіп ұстауға ерекше көңіл бөлінді. 700-ден астам орындық пен қоқыс жәшігі жиынтығы, 15 шағын архитектуралық пішіндер мен 10 балалар ойын алаңы қалпына келтірілді. Ондағы 2,5 мың шаршы метр гранит жабыны және 1 мыңнан астам тас төсемі ауыстырылды. 

Алматы ауданының ғана емес, бас қаланың ең ірі діни-рухани орындарының бірі ретінде танылған «Әзірет Сұлтан» мешіті алаңында шамамен 4 мың шаршы метр тас төсемі және 2,5 мың шаршы метрден астам гранит плиталары ауыстырылды. Сондай-ақ мешіттің күмбездері сырланып, ғимараттың салтанаты бұрынғыдан да арта түсті.

Тәуелсіздік, Қажымұқан, Қошқарбаев, Нәжімеденов, Момышұлы, Төлебаев, Айнакөл көшелері аумағында да 8 мың шаршы метрден астам тас төсемі ауыстырылды. 200-ден астам орындықтар мен қоқыс жәшігі жиынтығы сырланып, қалпына келтірілді. Яғни 105 аула жөндеуден өтіп, шамамен 5 мың шаршы метр жол асфальтталды.

Абаттандырумен қатар көгалдандыру жұмыстары да тұрғындар үшін қолайлы  орта жасауға көмектесетіні белгілі. Мұны ескерген әкімшілік жыл басынан бері аудан аумағында 6,5 мыңнан астам ағаштың отырғызылуына ықпал етті. Нәтижесінде М.Әуезов ескерткішінің маңы, Т.Жүргенов көшесі, Тәуелсіздік даңғылы, Ақбұлақ өзенінің бойындағы жағалау, Ақ шаңырақ алаңы,  Қ.Сәтбаев ескерткіші маңындағы жасыл желектің саны артты. 20 мың шаршы метрден астам алаңға көгал төселіп,  5 мың сәндік бұталар отырғызылды. Ал көшелерге егілген 9 мыңнан астам бір жылдық гүлдер жаз маусымы бойы ауданның көркіне көрік қосып тұрды. 

Қоғамдық кеңістіктерді абаттандыру аясында ауданда шамдары бар 200-ден астам тірек орнатылып, шамамен 6 мың метрлік кабель төселді.

Бұрын жарықтандырылмаған 10 көше мен жолдарда 90-ға жуық шам тіректері орнатылып, самаладай жарқырады. Ауданның 52 нашар жарықтандырылған учаскелерінде 193 қосымша жарық диодты шамдар жағылды.

Бұйрат, Ақтекше, Қарашығанақ көшелеріндегі 198 жарықтандыру тіректеріндегі қуат қалпына келтірілді. Шамамен 2 мың метр кабель тартылды, ал қолданыстағы кабель желілері қалпына келтірілді.  

Жыл басынан бері 109 желісі арқылы тек қана жарықтандыру мәселесі жөнінде 3250-ден астам тұрғынның өтініші қаралыпты. 2023-2024 жылдары 13 нысанды декоративті жарықтандыру бойынша жұмыстар жүргізілген.

Биыл Алматы ауданының балансына 17 көше қабылданды.