Отбасын сақтап, дені сау ұрпақ тәрбиелеу: медиаторлар дауды бейбіт жолмен шешу жайлы тәжірибесімен бөлісті

Алматы ауданының судьясы Айгүл Молдыбаева кездесу қатысушыларына медиаторлардың жұмысы, сондай-ақ сот дауларын бейбіт жолмен шешудің маңыздылығы туралы әңгімелеп берді. «Судья-медиаторлар екі тарапты да қосу үшін жұмыс істеуде. Барлығы онлайн форматта өтеді, өйткені соттар әзірге жабық. Жауапкерге жазбаша талап арыз беріледі және бейбіт шешу мәселелері туралы ойлануға уақыт беріледі. Материалдық және моральдық шығындарды болдырмау үшін біз екі тарапты да дауды бейбіт жолмен шешуге шақырамыз. Қазір соттардың тараптарды татуластыру, кез келген дауды бейбіт келісіммен шешу бойынша белсенді жұмысы жүргізіліп жатыр», - деп түсіндірді судья. Айгүл Молдыбаева негізінен некені бұзуға өтініш берген отбасылық жұптармен жұмыс істейді. Оның айтуынша, медиаторлар екі тарапты мұқият тыңдап болған соң отбасын сақтап қалу үшін барлық мүмкіндікті пайдалануға тырысады. Бұрын 12 жылдық тәжірибесі бар мұғалім ретінде судья толық отбасыларда балалар психологиялық тұрғыдан сенімді және өмірлік жағдайларға дайын болатындығын қозғап өтті. «Қазір отбасылық сот жобасы әзірленіп жатыр, ол неке-отбасылық қатынастардан туындайтын мәселелерді қарастырады. Некені бұзудан, мүлікті бөлуден немесе өндіріп алудан, ата-аналардың балалармен қарым-қатынасынан, кәмелетке толмағандардың қылмысы талқыланады. Болашақта мұның барлығын отбасылық сот қарайды деп жоспарланып отыр», - деп атап өтті Айгүл Молдыбаева. Судья-медиаторлар тек ата-аналарды ғана емес, педагогтарға да қолдау көрсетеді. Мәселен, Айгүл Молдыбаева отбасылық жұптармен кездесуде бала тәрбиесі үшін жауапкершілік мектеп пен педагогтарға емес, бірінші кезекте оларға жүктелетінін еске салады. Кездесу барысында судья елордалық мұғалімдердің ата-аналармен арадағы жанжалды шешуге және құқықтық ақпаратты түсіндіруге қатысты сұрақтарына жауап берді. «Өскелең ұрпақтың білімділігі ата-аналардың беретін тәрбиесіне тікелей байланысты. Мен ерлі-зайыптыларға бәрі қалпына келетінін түсіндіруге тырысамын. Отбасындағы барлық нәрсе күшпен шешілетінін көріп өскен бала зорлық-зомбылықты қалыпты жағдай деп санай бастайды. Егер әр баланың жанында қолдау көрсететін, дұрыс бағыт беретін адам болса, онда қоғамда әлдеқайда күшті, моральдық тұрғыдан да сау ұрпақ өсіп-өнер еді», - деп атап өтті судья. Іс-шараны «Ерекше мерекелер» ҚҚ, «QORGAU «халықаралық медиация және келіссөздер академиясы» ҚҚ және «QORGAU» заңгер-медиаторлар интеллектуалды клубымен ұйымдастырды.