Жол-көлік оқиғаларының үштен біріне жылдамдықтың артуы себеп болып отыр – ІІМ

Серік Түсіповтың мәліметінше, 2020 жылдың 9 айында ел жолдарында 8 933 ЖКО орын алған, онда 1 265 адам қаза тауып, 11 780 адам жарақат алған. Өткен жылдың ұқсас кезеңімен салыстырғанда ЖКО санының 22%-ға төмендегені байқалады. Кәмелетке толмағандардың қатысуымен болған апаттардың барлық көрсеткіші де орта есеппен 30%-ға төмендеді. «ЖКО жасаудың негізгі себептері бұрынғысынша жол қозғалысы ережелерін бұзу болып отыр. Осылайша, барлық ЖКО-ның үштен бірі жылдамдық режимінің артуына байланысты орын алады – бұл 2 833 ЖКО, онда 527 адам қаза тауып, 3 918 адам жарақат алды. Жол-көлік оқиғаларында қаза тапқандар мен жараланғандардың төрттен бір бөлігін жаяу жүргіншілер құрайды. Жаяу жүргіншілердің кінәсінен 356 ЖКО орын алды, онда 75 адам қаза тауып, 298 адам жарақат алды», — деді ІІМ өкілі. Оның айтуынша, елді мекендерде барлық ЖКО-ның 75%-ы немесе 6 740 оқиға тіркелген, олардың үлесіне қаза болғандардың 40%-ы және зардап шеккендердің 70%-ы тиесілі.