«Астана Балет» елордалық дәрігерлерге арнап үш қайырымдылық концерт өткізді

Астаналық театр әртістері екі бөлімнен тұратын концерттік бағдарламасын тарту етті: Рикардо Амарантенің «LoveFearLoss» бір актілі балеті мен «Ұлы Дала мұрасы» дивертисменті. Осы хореографиялық топтамаға Айгүл Тәти, Анна Цой, Зауырбек Райбаев, Дәурен Әбіров сынды кешегі және бүгінгі қазақстандық балетмейстерлер қойған 13 би миниатюрасы енген. Концерттің ерекше миссиясы жайлы «Астана Балет» театрының хореографы, Қазақстанның еңбек сіңірген қайраткері Айгүл Тәти айтып берді. «Біздің хореографиялық тартуымыз шынайы құрметтен туындап отыр. Біз бұл өнердің емдік қасиетіне сенеміз. Ол рухыңызды асқақтатып, жаныңызды жадыратады. Қазіргідей күрделі кезеңде мұның өзі өте маңызды», - деген ойымен бөлісті ол. «Астана Балет» театрының жетекші солисті Айжан Мұқатова да оның бұл ойымен келісіп, іліп әкетті: «Қиындыққа төзіп, өз денсаулығы мен өмірлеріне төнген қауіпке қарамай, дәрігерлік міндетін адал атқарып жүрген адамдарға деген құрметім шексіз», - деді ол. Жеті жүзден астам адамға арналған көрермен залы бұрынғыдай емес, өзгешелеу көрінді: астаналық санитарлық дәрігердің қаулысына сәйкес, спектакль аудиториясы елу адамнан аспауы тиіс. Алайда, осыншалықты бос залдың өзінде, концерттен кейін әртістерге көрсетілген қошемет өте зор еді. «Ерекше эстетикалық ләззат алдым. Әртістердің пластикасы қандай, шіркін?! Заманауи өрнектерге бай ұлттық нақыштағы би қандай?! Бәрі өте әдемі, өте әсерлі болды. Талантты әртістеріңіз қуанышты көңіл-күйімен бөлісті. Мұны әр көрермен сезінгеніне шүбәм жоқ», - деген ойымен бөлісті қалалық фтизиопульмонология орталығының дәрігері Гүлнар Аманжолова. Театр басшылығы он қайырымдылық концерт өткізуді жоспарлап еді, соның алтауы Шымкент пен Нұр-Сұлтан қалаларында өтті. Қараша айында театр Қарағанды мен Семейде тағы 4 қайырымдылық концерт өткізбекші.