Мемлекет басшысы Әзербайжан Президентіне көңіл айтты

Президент Қасым-Жомарт Тоқаев Ильхам Әлиевке Маңғыстау облысында Әзербайжанның әуе жолдары ұшағы апатқа ұшырап, экипаж мүшелері мен жолаушылардың қаза тапқаны туралы суыт хабарды терең күйзеліспен қабылдағанын жеткізді, деп хабарлады Elordainfo.kz.

– Орны толмас ауыр қайғыға ортақтаса отырып, Сізге, қаза тапқан азаматтардың туған-туыстарына және барша Әзербайжан халқына көңіл айтамын. Менің тапсырмаммен Қазақстан Үкіметі мемлекеттік комиссия құрды. Комиссия құтқару операциясы аясында тиісті шаралар қабылдап, Әзербайжан тарапына қажетті көмек көрсетеді, – делінген жеделхатта.

Айта кетейік, Ақтау қаласының маңында ұшақ апатқа ұшыраған болатын. Қайғылы оқиғаның себеп-салдарын тексеру үшін Үкіметтік комиссия құрылды. Ұшақ апатына байланысты қылмыстық іс қозғалды.