Головкиннің қарсыласы Қазақстан туы бейнелеген жаңа капасын көрсетті

Орта салмақта өнер көрсететін украиналық боксшы Сергей Деревянченко жаңа капасын көрсетті. Онда Қазақстанның туы да бейнеленіпті,  деп хабарлайды Елорда Инфо Vesti.kz сайтына сілтеме жасап. Қазақстандікінен бөлек капада Украина, АҚШ және Италия тулары бейнеленген. Украиналық боксшы Қазақстанда "Астана Арландарымен" WSB-де өнер көрсеткен, ал Италияда Milano Thunder командасы үшін жұдырықтасқан. "Кәсіпқойда бәрінің өз мағынасы бар, кішкентай ғана бөлшектердің де", - деп жазыпты Деревянченко Instagram желісінде. Еске салайық, 26 қыркүйекте Деревянченко орта дивизионда WBC чемпионы америкалық Джермалл Чарломен жекпе-жекке шығады. Кейінгі кездесуінде украиналық боксшы төрешілер шешімімен қазақстандық Геннадий Головкиннен жеңілген еді.