Елордада Рәміздер күніне орай 28 автокөлік пен 28 мотоцикл 28 шақырым жолды басып өтеді

Нұр-Сұлтан қаласы әкімдігінің «Астана жастары» жастар-ресурсы орталығы басшысының орынбасары Аян Ерментаев Рәміздер күні атқарылып жатқан іс-шаралар барысымен таныстырып өтті, деп хабарлайды Елорда Инфо. «Қазіргі уақытта Қазақстан рәміздерінің 28 жылдығына орай Нұр-Сұлтан қаласында ауқымды іс-шара ұйымдастырылып отыр. Бұл шара бірнеше кезеңнен тұрады. Оның алғашқы кезеңінде 28 автокөлік пен 28 мотоцикл 28 шақырым жолды басып өтеді. Басты мақсат – рәміздерімізді ұлықтау. Екінші кезеңінде су көліктері де 28 шақырымды жүріп өтеді. Бұл шараға 100-ге жуық қала тұрғыны мен волонтер атсалысып жатыр. Бұл – бір сағаттық емес, кешке дейін жалғасатын шара», - дейді «Астана жастары» орталығының өкілі. Мерекелік іс-шараның үшінші кезеңі Ұлы Отан соғысының ардагерлерін еске алуға арналатыны мәлім болды. «Жеңістің 75 жылдығына орай ұйымдастырылған шерудің соңғы нүктесі Отан қорғаушылар алаңына барып тоқтайды. Ол жерде Нұр-Сұлтан қаласының қонақтары мен тұрғындары 75 гүл шоғын қойып, мерекені атап өтеді. Бұл іс-шара 2017 жылдан бері өтіп келеді. Өткен жылдан ерекшелігі биыл бәрін 28 санымен байланыстырып отырмыз. Ал «Думан» қонақүйінің жанында кешке «28» деген жазуы бар тумен жүріп өтеміз», - дейді Аян Ерментаев. Сөз соңында қаламыздағы орталық саябақтың бәрінде сурет салу шарасы өтетінін айрықша атап өтті.