Астанада қарттар күніне арналған мерекелік концерт өтті

Еркеғали Рахмадиев атындағы филармонияда Халықаралық қарттар күніне арналған концерт өтті. Музыкалық кеш қонақтарын Астана әкімі Алтай Көлгінов мерекемен құттықтады, деп хабарлады Elorda.info.

Елорда әкімі Алтай Көлгінов аға буынға қаланың дамуына қосқан үлесі және бірнеше ұрпақты тәрбиелегені үшін алғысын білдірді.

Біздің әрбір тұрғынымыз қаланың дамуына өз үлесін қосты. Аға буынымызға алғыс айтқым келеді. Олар түрлі салаларда еңбек етіп, бірнеше ұрпақ тәрбиелеп, жастарға жол сілтеді. Мемлекет қарияларға қолайлы жағдай жасайды: зейнетақы мен түрлі төлемдердің мөлшері артады, қарттарды қолдау бойынша шаралар қабылданады және т.б. Қарты бар ел – қазыналы ел. Біз аға буынды бағалаймыз және құрметтейміз. Сіздерге ұзақ өмір және мықты денсаулық тілеймін! - деп қала әкімі аға буынға тілегін білдірді.

Концерт қонақтарының бірі Сарыарқа ауданының белсенді ұзақ өмір сүру орталығының жетекшісі Кенжеболат Бапишев болды.

Халықаралық қарттар күні – бұл егде жастағы адамдарға еңбегі үшін көрсетілген құрметтің белгісі. Бұл қоғамға егде жастағы адамдардың құрметке лайық екенін еске салады. Олар қаншама жыл еңбек етті, зауыттар, қалалар, фабрикалар салды, тың жерлерді игерді. Мұның бәрі тарих және оны, әсіресе жас ұрпақ ұмытпауы керек. Бұл күн күздің сыйы секілді, өйткені бұл адамдар жасына қарамастан әлі де жұмыс істей алады. Менің ойымша, алтын күз – бұл әдемі уақыт және адамның алтын жасы, - дейді ол.

Зейнеткерлікке шыққанына қарамастан, көптеген адамдар белсенді өмір салтын жалғастырып, қаланың қоғамдық өміріне қатысады.

Қарт адамдарға үнемі назар аударылады. Мектептерде кездесулер өткізіледі, концерттер, түрлі спорттық іс-шаралар ұйымдастырылады. Бүкіл әлем аға буынның еңбегін мойындайды. Ардагерлер кеңесінде үлкен жұмыс жүріп жатыр: біз дәрі-дәрмек сатып аламыз, қажет адамдарға азық-түлік себеттерін әкелеміз, жалғызбастыларға қамқоршылар мен үй көмекшілері көмекке келеді. Мысалы, бізде жыл сайын ағаш отырғызатын 90 жастағы ардагер бар, - деп бөлісті "Премьер" ТК ардагерлер ұйымының басшысы Әбдібек Асқанбеков.

Концерт барысында филармония залында қолдан жасалған бұйымдар жәрмеңкесі ұйымдастырылды. Олардың барлығын "Өз қолыммен жасалған сыйлық" клубының шеберлері дайындады.

Бұл клуб жақында құрылды. Көшбасшы ретінде мен оны осылай атадым, өйткені біреуден өз қолымен жасаған сыйлықтарды алу қандай жақсы. Үйірмеге 30 адам жазылды. Барлығына ұнайды, қуанып жүреді. Біз әртүрлі материалдармен жұмыс істейміз: киіз, әртүрлі маталар және текстуралар. Тойбастар, қуыршақтар, себеттер және тағы басқа да сыйлықтар жасаймыз, – деп бөлісті еңбек терапиясы клубының нұсқаушысы Альфия Чернотевич.

Айта кету керек, Халықаралық қарттар күніне арналған іс-шаралар елордада жалғасуда. Қала мекемелері осы мерекеге орай ондаған көрмелер, қойылымдар, концерттер, ойын-сауық сағаттары және т. б. ұйымдастырды.