Елордада шетел азаматтарының 774 көші-қон заңнамасын бұзу фактісі анықталды

Төрт күн ішінде елордалық гарнизонның қызметкерлері шетелдік азаматтардың елге келу ережесін бұзудың 774 фактісін анықтап, халықаралық іздеуде жүрген 8 азаматты ұстады, оның ішінде 1-еуі шетел азаматы.

Есіл ауданының полицейлері мемлекетаралық іздеуде жүрген 42 жастағы Өзбекстан азаматын ұстады. Ол 2021 жылдың желтоқсан айынан бастап Өзбекстан Республикасы Наманган облысы Ішкі істер басқармасының «қамау» бұлтартпау шарасымен іздеуде жүрген.

Сол жылдың қазан айында үйінің маңындағы ағаштарды кесіп жатқан жерінде көршісімен жанжалдасып, жанжал кезінде оған қайшымен дене жарақатын салғаны анықталды.

Қылмыстық қудалаудан жасырынған өзбек азаматы Қазақстан аумағына қашып кеткен. Шетелдік азамат елордадағы қонақүйлердің бірінде аспаз болып жұмыс істеген. Қазіргі уақытта ер адам одан әрі Өзбекстанға экстрадициялау үшін ПД-нің уақытша ұстау изоляторына қамалды.