Грэпплингтен өткен әлем чемпионатында елорда спортшылары 8 медаль жеңіп алды

Әлем біріншілігінде Әзербайжан, Армения, Беларусь, Венгрия, Испания, Италия, Қырғызстан, Литва, Ресей, Филлипин, Хорватия, Қазақстан елінен барлығы 150-ге жуық спортшы қатысты. Спортшылар 16-17, 18-20 жас бойынша сынға түсті. Алихан Хабибулла грэпплингтен 16-17 жас аралығындағы жастар арасында 84 келі салмақ дәрежесінде бірінші орынды жеңіп алды. Сол сияқты грэпплинг ги бөлімінен де қарсылас шақ келтірмей алтынан алқа тақты. Тағы бір алтынды ел қоржынына 130 келі салмақта Русланали Мұхамадиев салды. Ал өз кезегінде грэпплинг бөлімінде Александр Назаренко екінші орын, Заңғар Абзал үшінші орынды иеленсе, грэпплинг ги бөлімінде Заңғар Абзал, Кирилл Ткач күміс жүлде, Нұржан Батырбеков қола жүлдені жеңіп алды. Грэпплингтен Нұр-Сұлтан қаласының №7 балалар мен жасөспірімдердің мамандандырылған спорт мектебінің жаттықтырушысы Тоқтар Зарубеков елордалық спортшылардың қарқынын жоғары бағалады.

«Бұл әлем чемпионатына біз Түркістан облысының Шардара қаласында өткен Қазақстан чемпионатындағы іріктеуден кейін маусым айынан бастап дайындалдық. Чемпионатта өзімнің жеке оқушыларым және өзге де жаттықтырушылардың шәкірттері өнер көрсетті. Менің ойымша, спортшыларымыз жоспарды 200% орындады. Нәтиже керемет. Русланали Мұхамадиев Нұр-Сұлтан қаласынан жасөспірімдер арасында алғашқы әлем чемпионы атанды. Ол кадет ретінде қосымша анықтама бойынша жасөспірімдер арасында өнер көрсетті. Сондай-ақ Алихан Хабибулла грэпплинг және грэпплинг ги бөлімдеріндегі кадеттер арасында алғашқы әлем чемпионы атанды. Бәсекелестік өте күшті болды. Негізгі қарсыластар дағыстандықтар, дәлірек айтқанда Ресей мен Филлипиндер болды», - деді жаттықтырушы.

Сонымен қатар аталған чемпионатта ел құрамасы 18 алтын, 25 күміс, 19 қола жүлемен жалпы командалық есепте екінші орынға жайғасты.