Елімізде сыртқы сауда тауар айналымы 13,4 пайызға өскен

Бұл туралы Үкімет отырысында Ұлттық экономика министрі Әлібек Қуантыровтың баяндамасында айтылды, деп хабарлады Elorda.info тілшісі.

Алдын ала қорытынды бойынша 2023 жылғы қаңтар-наурызда сыртқы сауда тауар айналымы 13,4%-ға өсіп, 32,7 млрд долларды құрады. Экспорт 18,7 млрд долларды құрады. Бұл ретте өңделген тауарлар экспорты 8,1%-ға ұлғайып, 5,9 млрд долларға жетті. Тауарлар импорты 14 млрд долларды құрады. Жалпы, оң сауда балансы 4,8 млрд долларға тең, - деді министр. 

Министрдің мәліметінше, елімізде өңдеу өнеркәсібінде оң өсу сақталып отыр. Сәйкесінше өндіріс көлемі 5,1%-ға өскен. Соның ішінде ең жоғарғы өсуді Қостанай, Солтүстік Қазақстан, Абай облыстары және Алматы қаласы көрсетті.

Зарина СӘРСЕНБАЙҚЫЗЫ