Биыл Қытайға 2 млн тоннадан астам астық экспортталады

Теміржолды алдағы егін науқанына дайындау аясында ҚТЖ-ның мемлекеттік органдармен және тасымалдау процесіне қатысушылармен бірқатар кеңестер мен кездесулер өткізілді, деп хабарлады Elorda.info.

Теміржол жұмысы бойынша бірқатар шаралар ағымдағы жылдың 11 шілдесінде уәкілетті мемлекеттік органдар, салалық қауымдастықтар және жүк жөнелтушілер өкілдерінің қатысуымен дөңгелек үстел шеңберінде қалыптастырылды.

Биылғы астық тасымалдауды ұйымдастыру үшін ҚТЖ өңірлердегі және орталық деңгейдегі астық штабтарының жұмысын күшейтеді. Сондай-ақ, Қостанай-Галаба, Көкшетау-Галаба, Қостанай-Ташкент торабы тікелей құрама пойыздарын қалыптастыру үшін кестелер тізбегі әзірленетін болады.

 Қазақстандық дәнді дақылдарды өткізудің дәстүрлі нарықтары Орта Азия, Ауғанстан және Иран елдері болып табылатынына қарамастан, соңғы жылдары қытайлық жүк алушылардың қазақстандық астық пен ұнтақ өнімдеріне сұранысы артып келеді.

2023-2024 жылғы маусымда ҚХР-ға астық экспорты алдыңғы маусыммен салыстырғанда +21%, ұнтақ өнімдері-24% өсті. ҚТЖ бірінші жартыжылдықта 757 мың тонна астық жөнелтілді.

16 шілдеде үкіметте вице-премьер Серік Жұманғариннің төрағалығымен өткен кеңесте «ҚТЖ» ҰК» АҚ Басқарушы директоры Бауыржан Орынбасаров қазақстандық темір жолдары жөнелтушілер арасында пойыздарды біркелкі бөлу кезінде ағымдағы жылы Қытайға экспортқа 2 млн тоннадан астам астық жіберуге дайын екенін атап өтті.

ҚР мен ҚХР темір жолдары арасындағы екіжақты ынтымақтастық шеңберінде «бір жөнелтуші - бір алушы» қағидаты бойынша Алашаңқай станциясының бондтық аймағында түсіруді қамтамасыз ету үшін маршруттық жөнелтілімдерді ұйымдастыру туралы уағдаластыққа қол жеткізілді. Осы станция бағытында ағымдағы жылдың маусым айында астық тасымалдаушылар мен астық жүктері бар жабық вагондарды қабылдау басталды.