Елде 7 мыңға жуық адам онкологиялық дерттен көз жұмды

 Елімізде онкологиялық ауруға шалдыққандар саны артып барады. Биыл жарты жылдың ішінде Қазақстанда 7 мыңға жуық адам қатерлі ісіктен қайтыс болған, деп хабарлады Elorda.info «Хабар24»-ке сілтеме жасап.

Қазір елімізде сырқатты ерте анықтауға мүмкіндік бар дейді мамандар.

Елорда тұрғыны Қуандық Ахметовтың қатерлі ісікпен күресіп келе жатқанына 6 жыл болды. Көмейдегі рактың кесірінен күлу түгілі көп сөйлеуге болмайды. Дәрігерлер тыйым салған. Қазір тамағына – трахеостома, яғни, арнайы түтік орнатылған. Осы күнге дейін ер азамат 11 операция және 34 сәулелік терапиядан өткен. Бұл құрылғысыз Қуандық Ахметов дем ала алмайды.

Симптомдар болғанын біз қазір білеміз. Ол кезде аурудың белгілері байқалмады. Дауысы отырып қалады, кейін қайтып шығады. Жырты жыл солай болған шығар. Біз оны балмұздақты көп жегеннен шығар деп ойладық. Өйткені тым жақсы көреді, - деді қала тұрғыны Қуандық Ахметов.

Қатерлі ісік – бұл тек егде жаста кездесетін ауру емес. Гарвард медицина мектебі ғалымдарының зерттеулеріне сай - онкология 50 жасқа толмаған адамдарда жиі кездеседі. Биыл жарты жыл ішінде Қазақстанда 7 мыңға жуық адам обырдан қайтыс болған. Ресми статистикаға сәйкес, елімізде онкология өсімі бар, бірақ дәрігерлер аурушаңдық деңгейі сол қалпында, тек оны анықтау сапасы жақсарғандығын айтады.

Мәселен, ядролық медицина орталығында өндірілетін радиофармпрепараттардың көмегімен зерттеулердің санын 2 есеге дейін арттыруға болады. 

Қатерлі жағы өте минималды. Яғни бұл қалыптасқан организмге жасы 16-дан асқан адамдарға ешқандай қауіпті әсері жоқ деп есептелінеді. Өте аз дозада беріледі. Біз тек пациенттерге исследованиеден кейін 16 жасқа дейінгі балалар мен емізулі аналармен контактке түспеуге, яғни қасына жақындамауға, сөйлеспеуге ұсыныс береміз, - дейді Ядролық медицина орталығының радиоизотоптық диагностика дәрігері Мақсат Жайымбаев.

Жалпы ядролық медицина орталығы қазақстандықтарды қараша айынан бастап қабылдауды жоспарлап отыр. Диагностиканы кез келген отандасымыз міндетті медициналық әлеуметтік сақтандыру жүйесі аясында жасата алады.