Зияткерлік ойында Абай облысының ұстаздары топ жарды

Астанада «Aqyl Battle Cup» республикалық зияткерлік ойынының жеңімпаздары анықталды, деп хабарлады Elorda.info

Бұл туралы Азаматтық бастамаларды қолдау орталығының баспасөз қызметі хабарлады. 

Жарыс нәтижесінде Абай облысы лингвистикалық орталығының филологы Жандос Қалиақпаров, өңірге қарасты Абай ауданы орта мектебінің бастауыш сынып және математика пәнінің мұғалімдері Балауса Сайлаубекова мен Айтолқын Ермековалардан құралған «Телқара» командасы  «Aqyl Battle Cup» республикалық зияткерлік ойынының жеңімпазы атанды. Жеңімпаздарға 1 миллион теңге табыс етілді. 

Іс-шараны «Болашақ Қазақстанға» қоғамдық бірлестігі ұйымдастырды. Додаға еліміздің барлық өңірлерінен 14-35 жас аралығындағы 150-ден астам азамат қатысты. 

50 команда арасында өткен бәйгеде Абай облысының намысын қорғаған «Телқара» командасының мүшелері жеңіске жету оңай болмағанын айтады.

Ақырғы жарыста толқығанымыз, рас. Суперфиналдағы қарсыласымыз – жамбылдық команда екі күндік шайқаста ең үздік нәтиже көрсеткен болатын. Сондықтан бізге тапқырлық қана емес, жеделдік таныту да маңызды болды. Суперфиналдың жалғыз сұрағы Алашорда тарихымен байланысты болғандықтан, түймені қарсыласымыздан бұрын бастық. Ең бастысы, біз - өз оқушыларымызға үлгіміз, - деді «Aqyl Battle Cup» республикалық ойынының жеңімпаздары.

«Телқара» командасы бас жүлдеге тігілген  1 миллион теңгені еншілесе, І орын алған жамбылдық «Дара» командасы 500 мың теңгеге ие болды. Маңғыстау облысынан келген «West coast» командасы ІІ орынды және 300 мың теңгелік сыйлықты иеленді. ІІІ орын мен 200 мың теңгелік сыйлық Батыс Қазақстан облысынан келген «Europolis» командасына бұйырды.

Сонымен қатар, «Aqyl Battle Cup» республикалық зияткерлік ойынының қорытындысы бойынша ең креативті 3 команда анықталды. Шығармашылық командалар 300, 200 және 100 мың теңге мөлшеріндегі ақшалай сыйлықтармен марапатталды.

«Aqyl Battle Cup» республикалық зияткерлік ойыны биыл алғаш рет ҚР Мәдениет және ақпарат министрлігінің қолдауымен өткізілді. Іс-шараның басты мақсаты – мемлекеттік тілді жастар арасында білім мен бірліктің негізгі белгісі ретінде насихаттау. «Тіл тағдыры-ел тағдыры» жобасы аясындағы зияткерлік жарыс 2025 жылдың соңына дейін жыл сайын өткізіледі деп жоспарланған.

                                      Зарина СӘРСЕНБАЙҚЫЗЫ