Іздеу Үкімет мүшелері мен ұлттық компания басшылары Құрылтайға шақырылмады
Жәнібек Амангелді
Брифинг барысында журналистердің сұрақтарына жауап берген Құрылтай депутаты, Конституциялық заңнама, сот жүйесі және құқық қорғау органдары комитетінің төрағасы Үнзила Шапақ жекелеген министрлер мен квазимемлекеттік сектор басшыларының депутаттар алдында есеп беру тәртібін түсіндірді, деп хабарлайды Elordainfo.kz Құрылтайдың баспасөз қызметіне сілтеме жасап.
Журналистер депутаттан: «Жекелеген министрлер мен «Самұрық-Қазына» секілді квазимемлекеттік компаниялардың басшылары Құрылтай депутаттарының алдында есеп бере ме? Егер есеп беретін болса, қаншалықты жиі?» деп сұрады.
Үнзила Шапақтың айтуынша, Үкімет жұмысына қатысты мәселелер қаралған кезде жекелеген министрлер, мемлекеттік органдардың басшылары, сондай-ақ квазимемлекеттік сектор компанияларының жетекшілері Құрылтайға шақырылуы мүмкін.
Сонымен қатар Жоғары аудиторлық палата жылына екі рет баяндама жасайды. Оның бірі жылдық бюджеттің атқарылуына арналса, екіншісі жекелеген тақырыптар бойынша жүргізілген аудит қорытындыларына қатысты болады. Мұндай баяндамаларда квазимемлекеттік сектордың нәтижелілігі, ұлттық компаниялардың қызметі мен мемлекеттің қатысуымен жүзеге асырылатын іс-шаралардың тиімділігі қаралуы мүмкін.
«Осындай жағдайда квазимемлекеттік сектор мен тиісті компаниялардың басшылары келеді. Мысалы, «Самұрық-Қазына» қорының басшылығы да шақырылуы мүмкін», – деді депутат.
Сондай-ақ конституциялық заңдар деңгейінде Үкіметтің жекелеген мүшесінің қызметі туралы есепті тыңдау мүмкіндігі қарастырылған. Оның қорытындысы бойынша конституциялық жауапкершілік мәселесі де көтерілуі ықтимал.
Депутаттың сөзінше, осы рәсімдер аясында ұлттық компаниялардың басшылары Құрылтайға келіп, депутаттардың сұрақтарына жауап бере алады.
