Іздеу 
Думан Аманжол
Бүгін швейцариялық технологиямен шығарылған Stadler вагондарынан құралған жолаушылар пойызы алғаш рет «Нұрлы жол» вокзалынан жолға шықты, деп хабарлайды Elordainfo.kz «Қазақстан темір жолы» компаниясына сілтеме жасап.
Вагондар күн сайын № 3/4 «Нұрлы жол – Алматы-2» пойызының құрамында жүретін болады. Астанадан жөнелтілуі – сағат 13:10-да, Алматыға жетуі – келесі күні сағат 08:30-да.
Stadler вагондары Қазақстанның климаттық жағдайларына бейінделген және – 50-ден + 45 градусқа дейінгі температурада пайдалануға есептелген. Қызмет ету мерзімі 40 жыл.
Купе вагондары 40 жолаушыға, плацкарт вагондары 58 жолаушыға арналған. Жолаушылардың жайлылығы үшін климаттық бақылау жүйелері, жеке жарықтандыру, 220 В розеткалары, USB және USB-C қосқыштары, Wi-Fi, бейнебақылау және багаж аймақтары қарастырылған. Мобильділігі төмен жолаушылардың жол жүруіне арнайы жағдайлар жасалған. Пойыз құрамына вагон-буфет те кіреді.
«Бүгінгі таңда «Жолаушылар тасымалы» АҚ 100 астам Stadler вагонын қабылдады. Келісімшарт 2030 жылға дейін 557 жолаушылар вагонын кезең-кезеңімен жеткізуді, кейіннен сервистік қызмет көрсетуді көздейді», - делінген хабарламада.
Stadler вагондарының келесі құрамы 13 қарашада «Нұрлы жол – Семей» бағытында шығады. Билеттер темір жол билеттерін сататын ресми сайт пен теміржол кассаларында қолжетімді.
Еске салсақ, Астанада жасалған Stadler вагондарына билеттер сатыла бастағанын жаздық.
