Іздеу Астанада қар күреуге 3 мыңнан астам жұмысшы мен 1,7 мыңнан аса арнайы техника жұмылдырылды
Жәнібек Амангелді
Астанада толассыз қар жауып, көктайғақ орнады. Қаланың коммуналдық қызметі тәулік бойы үзіліссіз жұмыс істеп жатыр, деп хабарлайды Elordainfo.kz елорда әкімдігінің сайтына сілтеме жасап.
Өткен түнде қала аумағынан арнайы қар полигондарына 2 095 рейспен 30 мың текше метрден астам қар шығарылды. 6 ақпанның таңынан бастап қаланы қардан күреуге 3 128 жол жұмысшысы мен 1 768 арнайы техника жұмылдырылды.
Қыс маусымы басталғалы бері елордадан қар полигондарына барлығы 264 мың рейспен 3 млн 715 мың 837 текше метр қар шығарылды.
Ауа райына байланысты, күндіз температура нөлден жоғары болып, қар ериді, ал түнде күрт суытқанда жолдар мен тротуарларда көктайғақ орнайды.
Қала тұрғындарының қауіпсіз қозғалысын қамтамасыз ету үшін жолдарға, тротуарлар мен көшелерге техникалық тұз себіледі. Бұл жұмыс тәулік бойы, үзіліссіз жүргізіледі.
Қазгидрометтің болжамына сәйкес, 6 ақпанда Астанада негізінен қар жауып, көктайғақ болады. Түнде және таңертең тұман, күндіз боран күтіледі. Жел оңтүстік-батыстан солтүстік-батысқа ауысып, жылдамдығы 9-14 м/с жетеді, таңертең және күндіз екпіні 15-20 м/с-қа дейін жетеді.
Ауа температурасы түнде және күндіз -1…-3°С, күндіз одан әрі төмендейді.
7 ақпанда да төменгі боран мен қар жауады деп болжанып отыр. Жел оңтүстік-батыстан 9-14 м/с соғады. Ауа температурасы түнде -17…-19°С, күндіз -14…-16°С болады.
Астана әкімдігі тұрғындарды жолдарда сақ болуға және мүмкіндігінше алыс сапарларға шықпауға шақырады.
Төтенше жағдай туындаған кезде 112 нөміріне хабарласу қажет.
