2027 жылдың соңына дейін барлық су қоймасын цифрландыру жоспарланып отыр - Үкімет

Мемлекет басшысының 28 қазандағы «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауын жүзеге асыру жөніндегі Үкімет отырысында Жасанды интеллект және цифрлық даму министрі Жаслан Мәдиев Президенттің су ресурстарын цифрландыру және жасанды интеллектіні агроөнеркәсіптік кешенге енгізу жөніндегі тапсырмаларының жүзеге асырылу барысы туралы баяндады, деп хабарлайды Elordainfo.kz Үкіметтің баспасөз қызметіне сілтеме жасап.

Су ресурстарының ұлттық цифрлық жүйесі әзірленді, ал бес су қоймасы цифрлық сыңарларға ие болды. 2027 жылдың соңына дейін барлық су қоймаларын цифрландыру жоспарлануда. Ауыл шаруашылығында Smart Data Agro, Smart Farm және Smart Agro Platform платформаларын кезең-кезеңімен іске қосу көзделген.

«Көлік саласын цифрландырудың мақсаты – ішкі және халықаралық тасымалдар кезінде қағаз тауар-көлік жүкқұжаттарынан толық бас тарту. Электрондық рұқсаттар және электрондық жүкқұжаттар бойынша жобалар жүзеге асырылуда. Пилоттық жобалар бірқатар елдермен бірге жүзеге асырылуда», — деді Жаслан Мәдиев.

Еске салсақ, Үкіметте Премьер-министр Олжас Бектеновтің төрағалығымен «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауын жүзеге асыру жөніндегі отырыс өтіп жатыр.