Жыл басынан бері елімізде 600 мың тоннадан астам ет өндірілді

2025 жылдың шілде айының соңында Қазақстандағы ірі қара мал басы 8,7 миллионға жетті, деп хабарлады Elordainfo.kz.

Ауыл шаруашылығы министрлігінің мәліметінше, оның ішінде сиыр саны 4,5 миллион басты құрап, өткен жылмен салыстырғанда 3,1%-ға артты. Бұзаулар саны да өсіп, 2,7 миллионға жетті (+17,9%). Бұл ет өндірісінің көлемі алдағы уақытта да арта түсетінін көрсетеді.

Жыл басынан бері елде 608,8 мың тонна ет өндірілген, бұл өткен жылдың сәйкес кезеңімен салыстырғанда 1,8%-ға көп. Соның ішінде 205,7 мың тоннасы – сиыр еті. Бұл көрсеткіш ішкі нарықтағы еттің жеткілікті екенін және саланың тұрақты даму үстінде екенін білдіреді.

Сиыр етінің бағасы өңірлерге қарай әртүрлі. Өндірушілерден тірідей салмақта еттің көтерме бағасы 2400–3100 теңге/кг, ал бөлшек саудада 3000–3700 теңге/кг аралығында.

Бағаның көтерілуіне бірқатар ішкі факторлар әсер етті:

• Субсидиялардың қысқаруы,
• Энергия ресурстарының қымбаттауы (электр – +11,3%, газ – +15,9%, су – +96%),
• Жем-шөп пен ЖЖМ бағасының өсуі,
• Делдалдар мен логистика шығындары.

Соған қарамастан, қазақстандық сиыр етіне сыртқы нарықта сұраныс артып отыр. 2025 жылдың алғашқы алты айында экспорт көлемі 16,1 мың тоннаға жетіп, былтырғы көрсеткіштен 2,4 есе жоғары болды. Еттің негізгі экспорт бағыты – Өзбекстан, Тәжікстан, Қырғызстан, Қытай және БАӘ. Бұл – отандық өнімнің сапасы мен бәсекеге қабілеттілігінің дәлелі.

Қазіргі таңда бордақылау алаңдарының жүктемесі 35–40% деңгейінде. Осы көрсеткішті арттыру үшін 2025 жылдың 1 тамызынан бастап жеңілдетілген несиелеу бағдарламасы іске қосылды. Жылдық 5% мөлшерлемемен 12 айға берілетін кредитке 50 млрд теңге бөлініп отыр. Бұл қаржы жас мал, жем-шөп, жанар-жағармай және жабдық сатып алуға бағытталады. Нәтижесінде бордақылау алаңдарының жүктемесі 60%-дан жоғары деңгейге жеткізіледі деп күтілуде.

Жалпы, бағаның өскеніне қарамастан, ет өндіру әлі де рентабельді сала болып отыр. Мемлекеттік қолдау ұсыныстың қысқаруына емес, керісінше, өсуіне жол ашуда, бұл өз кезегінде елдің азық-түлік қауіпсіздігін қамтамасыз етуге үлес қосады.