Сенаторлар АЭС салу бастамасына қолдау білдірді

Сенаттың Экономикалық саясат, инновациялық даму және кәсіпкерлік комитетінің депутаттары атом және энергетика саласын дамыту мәселелері бойынша Энергетика министрлігінің өкілдерімен кездесу өткізді, деп хабарлады Elordainfo.kz.

Кездесуде отандық энергетика нарығының қазіргі жай-күйі мен проблемалық мәселелері талқыланды. Сенаторлар металлургия, көлік, IT, медицина, фармацевтика және ауыл шаруашылығы өнімдерін өңдеу салаларында жаңа жобаларды жүзеге асыру барысында туындаған электр энергиясы тапшылығының өсе түскеніне баса назар аударды. Осыған байланысты, энергетикалық қауіпсіздікті қамтамасыз ету үшін таза энергия көзі ретінде атом электр станциясын салудың маңызы зор болып отыр.

Шара барысында қатысушылар технология мен құрылыс ауданын таңдау, сондай-ақ қауіпсіздік, экология және әлемдік тәжірибе мәселелерін талқылады.

Депутаттар кездесу қорытындысы бойынша АЭС салу бастамасына қолдау білдірді және осы жобаның барлық мән-жайын халыққа кеңінен түсіндіру қажеттігін атап өтті.