Өңірлердегі баспана әділетсіз беріліп жатыр – сарапшы

Бұл туралы Қоғамдық қор басшысы Айнагүл Мұзафар Atameken Business телеарнасындағы «Түскі формат» бағдарламасында айтты, деп хабарлады Elordainfo.kz.

Сарапшы Айнагүл Мұзафардың сөзінше, өңірлерде баспана әділетсіз беріліп жатыр. 

«Бізге өңірлерден көп адамдар хабарласады. Олар «Үйді сәке, мәке арқылы алады» «Кезектен тыс өтіп жатыр» деп айтады. Мен онымен келісемін. Өйткені ешқандай ашықтық жоқ. Біз Астана қаласында баспана қалай беріліп жатқанын көріп отырамыз. Әкімдік ресми парақшасында тізімнің қалай жылжығаны, кімдердің үйлі болғаны туралы барлығы жарияланады. Ал басқа өңірлерде ондай тізім жоқ»,- дейді Қор басшысы. 

Сарапшы заң аясында әкімдіктер ресми түрде баспана кезегінде тұрған жандардың тізімін жариялау керек екенін айтты. 

«Негізі заң аясында әкімдіктер ресми түрде тізімді шығарып тұру керек. Әр адам кезекті тұрған адамдардың қалай үйлі болғандарын, алдында қанша адам бар екенін білу керек. Жақында «Тұрғын үй туралы» заңға өзгерістер енгізіліп, «Отбасы» банктің құзыреті кеңейген сол мұндай заңсыздықтар түбегейлі жойылады. Осы заңды біз көптен күттік»,- деді Айнагүл Мұзафар.