Қазақстан мен Әзербайжан әскери саладағы ақпаратты қорғау мәселелерін талқылады

Ақпаратты қорғау және техникалық барлауға қарсы іс-қимыл саласындағы әскери мамандардың кездесуі Қорғаныс министрлігінің Алматыдағы Радиоэлектроника және байланыс әскери-инженерлік институтында өтті, деп хабарлады Elordainfo.kz.

Әскери қызметшілер техникалық барлауды анықтау мен оған қарсы іс-қимылдың заманауи жүйелерін қолдану тәжірибесін, сондай-ақ ақпарат алудың тиімді әдістерін бөлісті.

– Бүгінгі таңда ақпараттық қауіпсіздіктің заманауи сын-тегеуріндерге қарсы тұруға озық технологиялар ғана емес, сонымен қатар мемлекеттік құпияларды қорғау әдістерін жетілдіруге бағытталған халықаралық ынтымақтастық көмектеседі, – деп ҚР Қорғаныс министрлігі Мемлекеттік құпияларды қорғау департаментінің бастығы, полковник Тимур Сәдуақасов кәсіби байланысты нығайтудың маңыздылығын айтты.

Тараптар бірлескен оқу-жаттығулар өткізуді, тәжірибе алмасуды және ақпаратты техникалық барлаудан қорғауды қамтамасыз етуде жаңа тәсілдерді әзірлеумен қоса ынтымақтастықты дамытуға мүдделі екенін атап өтті.