Аяз ата мен Ақшақар пойыздағы балаларға сыйлық үлестірді

Жаңа жыл қарсаңында «Жолаушылар тасымалы» АҚ Kaztechnology компаниясымен бірлесіп, арнайы безендірілген пойыздар мен электр пойыздарында жолаушыларға құттықтау шараларын ұйымдастыруда, деп хабарлады Elordainfo.kz.

Аяз ата мен Ақшақар кейпіндегі жолсеріктер жолаушыларға ерекше көңіл-күй сыйлап, балаларға мерекелік сыйлықтар табыс етті. Бүлдіршіндер қуанышпен тақпақтарын айтып, жаңа жылдық шараның жарқын кейіпкерлеріне айналды. Іс-шара аясында 2 мыңнан астам балаға сыйлықтар табысталады.

№4/3 «Астана-Алматы», №6803/6804 «Астана-Атбасар», №7507/7508 «Астана-Көкшетау» және №7553/6811/6812/7556 «Қарағанды-Астана-Бурабай» бағытындағы пойыздар қар ұшқындары, қысқы пейзаждар, шырша ойыншықтары мен гирляндалармен әсемделген. Бұл пойыздар қаңтар айына дейін қатынап, жолаушыларға ерекше мерекелік көңіл күй сыйлайды», - делінген хабарламада.

Айта кетейік, Аяз ата мен Ақшақар Жаңа жылды қарсы алатын түні де пойыздарда жолаушыларды құттықтайтын болады.