Air Astana Атыраудан Тбилисиге тікелей рейстерді іске қосады

Атыраудан Тбилисиге ұшатын жолаушылар үшін жақсы жаңалықты әуекомпаниясының баспасөз қызметі жариялады, деп хабарлады Elordainfo.kz.

«2025 жылғы 27 мамырдан бастап Air Astana Атыраудан Тбилисиге тікелей рейстерді іске қосады. Рейстер аптасына үш рет – сейсенбі, жұма және жексенбі күндері жайлы Airbus әуе кемелерімен орындалады.

 Ұшу ұзақтығы – 1 сағат 50 минут. KC125 рейсі Атыраудан жергілікті уақыт бойынша 08:00-де ұшып, Тбилисиге 08:50-де жетеді. Қайтар бағыттағы KC126 рейсі Тбилисиден 09:50-де ұшып, Атырауға 12:40-та қонады.

Барлық алым мен салықты қоса есептегендегі екі жаққа билет құны эконом-класта 113 375 теңгеден, бизнес-класта 308 081 теңгеден басталады. Билеттерді әуекомпанияның ресми сайтынан немесе уәкілетті агенттіктерден сатып алуға болады», - делінген хабарламада.

Жаңа бағыттың ашылуына байланысты Air Astana әуекомпаниясының жазғы кестесінде Тбилисиге орындалатын рейстер саны аптасына 15-ке дейін ұлғаяды. Қазақстанның үш қаласынан ұшу жүзеге асырылады: Алматыдан – аптасына тоғыз рет, Астанадан – үш рет, сондай-ақ Атыраудан – үш рейс. Қазақстан азаматтары Грузия аумағында визасыз бір жылға дейін бола алады.

Air Astana жолаушылардың ыңғайлылығы мен жайлылығы үшін ел өңірлерінен халықаралық рейстерді дамытуды жалғастырып жатыр. Қазіргі уақытта әуекомпания Шымкенттен Джидда мен Мәдинаға тұрақты рейстерді, Дохаға чартерлік рейстерді орындайды. Ал Атыраудан тұрақты рейстер Стамбұл, Дубай және Амстердамға орындалады.