Елімізде қанша адам фрилансер ретінде жұмыс істейді

Адам ресурстарын дамыту орталығы дайындаған «Қазақстанның еңбек нарығы: цифрлық шындық жолында» баяндамасына сәйкес, 2021 жылы елде 1 миллионнан астам адам фрилансер ретінде жұмыс істеген, деп хабарлады Elorda.info Finprom.kz-ке сілтеме жасап.

Мұндай жұмысшылардың 21,8%-ына немесе 228,3 мыңына фрилансерлік қызмет табыс табудың негізгі жолы болды. Ал тағы 78,2%-ы немесе 820,5 мың адам фрилансерлік қызметте де, жұмысқа орналасып та жұмыспен қамтылған.

Осылайша, 2021 жылы қызметкерлерді жұмыспен қамтудың жалпы көлеміндегі фрилансерлердің үлесі 16,6% болды. Бұл - айтарлықтай маңызды көрсеткіш.

Өңірлік тұрғыда фрилансерлердің басым бөлігі Алматы (244 мың адам) және Астана (133 мың адам) қалаларында, сонымен қатар Түркістан облысында (93 мың адам) жұмыс істеген. Үздік бестікке Шымкент (71 мың адам) пен Алматы облысы (68 мың адам) кірді. 

Баяндамада фрилансерлердің саны жылдан жылға артып келе жатқаны айтылған. Бұл секторға коронавирус пандемиясы ерекше серпін берді.

Айта кету керек, фрилансингті және жалпы қашықтан жұмыс істеу саласын дамыту қажет инфрақұрылымсыз, ең әуелі интернетсіз мүмкін емес еді. Бұл жерде мобильді интернет негізгі рөл атқарады: Қазақстандағы тіркелген интернет абоненттерінің саны 2,9 миллион болса, мобильді интернет абоненттерінің саны 17,2 миллионға жетті. Сонымен бірге интернетке қол жетімді ұялы байланыс абоненттерінің саны бес жылда небәрі 24,2% өсті. Ал он жылда өсім 63,9% болды.

Әлеуметтік желілердің тапсырыстар нарығы ретінде өсіп келе жатқан рөлін бөлек атап өткен жөн. TikTok, Facebook, Instagram және YouTube фрилансерлер арасында әлі де танымал. Оның үстіне әлеуметтік желілер мен бейнесервистер қала тұрғындарының ғана емес, ауыл тұрғындарының да барлық мүмкіндігін белсенді түрде пайдаланып жатқаны белгілі.

Мысалы, Tele2/Altel 2022 жылы 250+ ауылда өз желісіндегі трафикті тұтынуға зерттеу жүргізді. Оператордың мәліметі бойынша, Алматы және Жетісу облыстарының ауылдары тұтыну бойынша көш бастап тұр: барлық 250+ трафиктің 30%-дан астамы. Одан кейінгі орында Ақтөбе мен Қарағанды ​​облыстары тұр. YouTube, Instagram, TikTok, VK және Facebook Tele2/Altel желісіндегі 250+ ауылдың жалпы трафигінің 37%-ына тең. Ауыл тұрғындарының жыл басынан бері аталған қызметтерге жұмсаған жалпы уақыты 136 мың сағат (немесе жылдармен есептегенде 16 жыл) болды, бұл әлемдік үрдістерге сәйкес келеді.

Түрлі саладағы сарапшылардың пікірінше, қазір әлеуметтік желілердегі ауылдық тиктокерлер мен блогерлер санының қарқынды өсуі байқалады.