Азаматтардың өтінішін қарау барысында 5 мыңнан астам құқықтық норма зерделенді - Конституциялық Сот төрағасы

Бүгін Президент Қасым-Жомарт Тоқаевтың қатысуымен өткен Қазақстан Республикасы Конституциясының 30 жылдығына арналған «Конституция және мемлекеттілік: құқық пен болашақ диалогы» атты ғылыми-практикалық конференцияда ҚР Конституциялық Сотының төрағасы Эльвира Азимова сөз сөйледі, деп хабарлайды Elordainfo.kz.

Ол қазақстандық Конституциялық Соттың негізгі қызметі заңдардың және өзге де нормативтік құқықтық актілердің Конституцияға сәйкестігін тексеру екенін еске салды. 

«Мұндай өтінішпен Конституциялық Сотқа жүгінуге құқылы субъектілер қатарында бүгінде азаматтар, Адам құқықтары жөніндегі уәкіл және Бас прокурор бар. Бұл мүмкіндік оларға 2022 жылғы конституциялық реформа нәтижесінде берілді», - деді ол.

Оның сөзінше, 2023 жылғы қаңтардан 2025 жылғы тамызға дейін Конституциялық Сотқа азаматтардан 11 мыңнан астам өтініш келіп түсті. 

«Оларды қарау барысында 5 мыңнан астам құқықтық норма зерделеніп, 400-ден астам қаулы қабылданды. Соның ішінде 74 шешім Конституцияға сәйкестігін тексерудің нәтижесінде қабылданған қорытынды қаулылар болып табылады», - деп атап өтті Эльвира Азимова.