Жәнібек Әлімханұлы бокстағы басты мақсатын атады

Орта салмақта WBO және IBF нұсқалары бойынша әлем чемпионы Жәнібек Әлімханұлы дивизиондағы барлық басты чемпиондық белбеуді біріктіруді басты мақсат етіп отырғанын айтты, деп хабарлады Elordainfo.kz.

«Абсолютті чемпион – бұл бокстағы шынайы биік. Мен дәл соған қарай бет алып келемін. Менің салмақ дәрежемде менің алдымда тұрған ешкім жоқ», - деп жазды Жәнібек әлеуметтік желідегі Х парақшасында.

Айта кетейік, орта салмақтағы WBC белбеуі доминикандық Карлос Адамес, ал WBA титулы жасы келген кубалық Эрисланди Лараға тиесілі.

Жәнібек соңғы жекпе-жегін 2025 жылдың 5 сәуірінде Астанада өткізіп, француз Анауэль Нгамиссенгені бесінші раундта нокаутпен жеңіп, IBF және WBO белбеулерін сәтті қорғаған болатын.

Енді ол Адамеспен жекпе-жекке шығуды көздейді, алайда доминикандық боксшы чемпиондық атағын сарапқа салуға асығар емес.