Футболдан Чемпиондар лигасы: «Қайрат» пен «Семей» бүгін үшінші ойындарын өткізеді

Қазақстандық «Қайрат» пен «Семей» футзал клубтары бүгін UEFA Чемпиондар лигасының негізгі кезеңіндегі үшінші ойынын өткізеді, деп хабарлады Elordainfo.kz. 

Алдымен төртінші топта алматылық «Қайрат» Қазақстан уақытымен 21:00-де косоволық «Приштина» командасымен кездеседі. Ойын «Qazsport» телеарнасынан тікелей эфирде көрсетіледі.

Алғашқы екі турда алматылық команда хорватиялық «Ново Вриемені» 3:2 есебімен жеңсе, одан кейін Португалияның «Спортингтен» 2:7 есебімен жеңілді.

Ал «Приштина» бірінші ойында «Спортингтке» 1:19 есебімен ойсырай жеңілсе, келесі кезекте «Ново Вриемені» 7:6 есебімен тізе бүктірді.

Сондай-ақ үшінші топта «Семей» Испанияның «Пальма» клубымен ойнайды. Кездесу Қазақстан уақытымен 23:30-де басталады.

Қазірге дейін семейлік команда Чехияның «Хрудимін» 9:5 есебімен жеңсе, франциялық «Этуальға» 3:4 есебімен есе жіберді.

Негізгі кезеңнің алғашқы екі ойынында испаниялық клуб «Этуальдан» 2:1, «Хрудимнен» 9:3 есебімен басым түсті.