Футболдан Қазақстан құрамасы Даниядан жеңіліп қалды

Қазақстан құрамасы Еуро-2024 іріктеу кезеңінің жетінші ойынын сырт алаңда Дания құрамасымен өткізді. Матч 3:1 есебімен алаң иелерінің жеңісімен аяқталды, деп хабарлады Elorda.info.

Алғашқы таймда Дания құрамасы аса қатты басымдыққа ие болмады, алайда үзіліске дейін екі гол соқты. Ең алдымен Джонас Винд есеп ашса, әрі қарай Роберт Сков есепті еселей түсті. 

Екінші таймның басында тағы да Роберт Сков көзге түсіп, есепті ұлғайта түсті. Көп ұзамай Қазақстан құрамасы есеп айырмасын қысқартты. Гол авторы – Ян Вороговский. Әрі қарай біздің жігіттердің гол соғатын мүмкіндіктері болғанымен ойын есебі өзгермеді – 3:1.

Н тобындағы жетінші турдың қорытындысы бойынша Қазақстанның қоржынында 12 ұпай бар. Ұлттық құрама келесі ойынын 17 қазан күні Хельсинкиде Финляндия құрамасымен өткізеді.

Дания – Қазақстан – 3:1 (2:0)

Голдар: Винд 36, Сков 45+1, 48 – Вороговский 58.