Елордалық оқушы дойбыдан әлем чемпионатында қола жүлдегер атанды

Түркияның Алания қаласында зияткерлік ойын – дойбыдан жасөспірімдер арасында әлем чемпионаты өтті, деп хабарлады Elorda.info қала әкімдігінің ресми сайтына сілтеме жасап.

Жарысқа Қазақстан, Ресей, Болгария, Беларусь, Қырғызстан, Франция, Замбия, Чехия, Германия, Өзбекстан, Әзербайжан, Румыния, Түркия мемлекеттерінен 200-ге жуық дойбы шеберлері қатысты.

Әлем елдерінің дойбышыларының басын біріктірген додада республикалық жарыстардың 6 дүркін чемпионы, елордалық Іздәш Айзере бақ сынап жүлделі оралды.

Мен әлем чемпионатына бірінші рет қатыстым. Жаһандық дода өте жақсы өтті. Бірақ бұл орынды алу маған оңайға соқпады. Жарыс үш номинацияға бөлінді. Ол классика, рапид және блиц. Бірінші блицтен жарыс өтті. Алғашқы ойнаған қарсыласым Диана Андреева болды. Қарсыласым болғанына қарамастан маған мотивация берді. Келесі ойын рапид болды. Бұл номинацияда үшінші орын алып келдім. Ал классика аздап қиын болды. Басқа қарсыластарымнан осал түсіп қалдым. Бірақ мен үздік ондыққа кірдім. Енді келесі үлкен жарыстарда бірінші орын аламын деп сенемін, - дейді әлем чемпионатының қола жүлдегері Айзере Іздәш.

Дойбының рапид түрінен 11 жасқа дейінгі қыздар арасында сынға түсіп, қола жүлдегер атанған Айзере Іздәшті Астана қаласының Дене шынықтыру және спорт басқармасының басшысы айтулы жетістігімен құттықтады.

Еліміздің атын әлемге танытып, байрақты бәсекеде қарсыластарына дес бермей 21 ойын өткізіп, үздік үштік қатарынан көрінген Айзерені айтулы жеңісімен құттықтаймын. Алдағы уақытта халықаралық жарыстарда тек жеңіске жетуіне тілектеспін! - деді қалалық Дене шынықтыру және спорт басқармасының басшысы Самат Жылқыбаев.