Елордада қол добынан «Astana Cup» ашық турнирі өтуде

Астанада Тәуелсіздік күніне арналған жасөспірім ұлдар мен қыздар командалары арасында қол добынан «ASTANA CUP» ашық турнирі өтіп жатыр, деп хабарлады Elorda.info.

Шараның ашылу салтанатына Астана қаласының Дене шынықтыру және спорт басқармасының басшысы Самат Жылқыбаев, елордалық гандбол федерациясының президенті әрі Астана қаласы Білім басқармасының басшысы Қасымхан Сенғазыев және қалалық спорт басқармасына қарасты бірнеше мекеменің басшылары қатысып, спортшыларға сәттілік тілеп, жылы лебізін білдірді.

Спортта қол жеткізген әр жетістік биік белестерге жол ашады. Өздеріңіздей жастардың спортпен шұғылданып, салауатты өмірді ұстануы болашақ үшін аса маңызды. Бүгін міне мерекелік жарыстың алдында Наманган қаласымен осы спорт түрін дамыту аясында екі жақты меморандумға қол қойылды. Елімізде соның ішінде Астана қаласында гандбол ойыны дамып келе жатқанына өте қуаныштымын. Алдағы уақытта бұл ойынды одан әрі дамыту үшін басқарма тарапынан тиісті жағдайлар жасалатын болады. Баршаңызға сәттілік, мықты ойын тілеймін, - деді қалалық спорт басқармасының басшысы Самат Жылқыбаев. 

Қол добы шеберлерінің додасына еліміздің 6 өңірінен (Қостанай, Қарағанды, Павлодар, Түркістан, Ақмола, Астана) бөлек Өзбекстаннан барлығы 10 командадан құралған 150 спортшы қатысып, өзара бақ сынасып жатыр. Олардың қатарында қалалық спорт басқармасына қарасты № 5 Олимпиадалық резерв спорт мектебінің тәрбиеленушілері де бар. 

 Сондай ақ, жарыс алдында Астана мен Наманган қалалары арасында спорт саласындағы Меморандумға қол қойылды. Жиын алдында екі жақты делегация мүшелері алдымен осы жылғы негізгі жетістіктері мен алға қойылған жоспарларына тоқталып, кейін екі тараптың спорт саласындағы келіссөздері басталды. 

Өзбекстанның делегация өкілі атынан Наманган облысының жастар саясаты және спорт басқармасының басшысы Анварджон Туйчиев, командалық спорт және жеңіл атлетика бойынша мамандандырылған балалар спорт мектебінің директоры Низомхон Ахмедов, жекпе-жек бойынша мамандандырылған балалар спорт мектебінің директоры Абдуллаев Исроил және олимпиадалық және ұлттық спорт түрлері бойынша мамандандырылған мектеп-интернатының директоры Умид Исманов қатысты. 

Астана қаласының Дене шынықтыру және спорт басқармасының хабарлауы бойынша, Наманган  қаласымен жасалған меморандумға сәйкес екі елдің арасындағы ынтымақтастықты одан әрі нығайту мақсатында  жаттықтырушылар мен спортшылардың біліктілігін арттыру бойынша семинар-тренингтер ұйымдастыру. Сондай-ақ, өңірдің спортшылары мен жаттықтырушыларының Астанада өтетін арнайы оқу-жаттығу жиындарына қатысуы спорттық жарыстарды өткізу туралы Меморандумға қол қойылды.

Айта өтейік, жарыс жеңімпаздары желтоқсанның 20-сы күні белгілі болады.

Қанат БАЙҰЗАҚОВ