«Болашақ» стипендиясына құжаттар қашан қабылданады

Ғылым және жоғары білім министрлігі 2025 жылы «Болашақ» халықаралық стипендиясына құжат қабылдау және конкурс өткізу мерзімдерін белгілеп, оны жария талқыға ұсынды, деп хабарлады Elordainfo.kz.

Бұйрық жобасына сәйкес:

-құжаттарды қабылдау мерзімі: 2025 жылғы 3 наурыз бен 17 қазан аралығы; 

-конкурс өткізу мерзімі: 2025 жылғы 1 сәуір мен 31 желтоқсан аралығы. 

Еске салайық, 2024 жылы «Болашақ» стипендиясын тағайындау үшін үміткерлерді іріктеу тәртібіне өзгерістер енгізілді. 

Оларға сәйкес, енді халықаралық және  республикалық олимпиадалардың жеңімпаздарын бакалавриат сатысында оқыту үшін жеке квота бекітіледі.

Сондай-ақ, студенттер екі серіктес ЖОО базасында ғылыми зерттеулер жүргізе алатын Split PhD докторантурасын енгізу ұсынылды. Басым мамандықтар тізімі басым бағыттар тізімі деп өзгертілді.

Тағы бір өзгеріс – «Болашақ» халықаралық стипендиясы иегерлерінің өтініштерін қарайтын комиссия пайда болады. Құжатта шығындарды өтеу және стипендиаттардың басқа да сұраулары бойынша рәсімдердің ашықтығы мен шешім қабылдау процесін реттеу үшін комиссия құрылады. Үміткерлерге мотивациялық хат – еркін нысанда эссе жазу қажет.

2024 жыл соңында Шетелде кадрлар даярлау жөніндегі Республикалық комиссияның шешімімен 271 қазақстандық азамат халықаралық «Болашақ» стипендиясының иегері атанды.