Шымкент полицейлері балалар үйінің тәрбиеленушісінің арманын орындады

Ислам Сүлейменовтің оқиғасын ерекше мереке қарсаңындағы нағыз ғажайып деп атауға болады.  – деп хабарлады Elorda.info  Polisia.kz. сайтына сілтеме жасап 

  14 жастағы Ислам – Шымкенттегі №4 балалар үйінің тәрбиеленушісі. Ол кішкентайынан полиция қызметкері болуды армандайды. Форма киген патрульдік көліктегі адамдардың жұмысын қызыға бақылайды екен. 

Тәртіп сақшылары жасөспірімнің арманын жүзеге асыруды ұйғарып, полиция департаментіне шақырды. Мұнда Исламға полиция басқармасының “жүрегі” – жедел басқару орталығы көрсетілді. Ол үлкен залдың қабырғасын алып жатқан экрандар арқылы мегаполис өмірін тамашалау кезінде түрлі эмоцияға бөленді. ЖБО-ға барғаннан кейін мектеп оқушысы патрульдік полиция полкінің қызметтік көлігінің жүргізуші орындығына отырып, көлік ішіндегі құрал-жабдықтармен танысып, нағыз рация арқылы байланысқа шықты, деп жазды дереккөз. 

Осыдан соң Ислам қаланың бас полицейімен кездесті. Думан Таев оны жылы қабылдап, болашақ офицермен кездескеніне қуанышты екенін білдірді. 8-сынып оқушысы құқық қорғау мамандығын таңдайтынын, өйткені ол әрқашан адамдарды қорғап, оларға көмектесуді қалайтынын айтты. Думан Таев жеткіншекке өз фуражкасы мен қолсағатты сыйға тартып, алға қойған барлық арман-мақсаттарына жетуін, болашағы жарқын болуын тіледі. 

Айта кетейік, №4 балалар үйінің тәрбиеленушілері төрт жылдан астам уақыттан бері Шымкент қаласы ПД қызметкерлерінің қамқорлығында. Ал осы мекеменің үш түлегі бүгінде ҚР ІІМ Қарағанды академиясының курсанты.