Нұрғиса Тілендиевтің 100 жылдығы: Астанада өңірлік филармония ұжымдарының қатысуымен концерт өтті

Елордада КСРО халық әртісі, Мемлекеттік сыйлықтың лауреаты, Халық қаһарманы Нұрғиса Тілендиевтің 100 жылдығына арналған «Құстар әні» республикалық фестивалі жалғасып жатыр. Кеше фестиваль аясында еліміздің бірқатар өңірінен келген филармония ұжымдарының қатысуымен концерт өтті, деп хабарлады Elordainfo.kz.

Астана қаласы әкімдігінің Еркеғали Рахмадиев атындағы Мемлекеттік академиялық филармониясында өткен концертке Солтүстік Қазақстан, Батыс Қазақстан, Қызылорда, Жетісу және Павлодар облыстарынан, сонымен қатар Семей,  Қарағанды, Шымкент қалаларынан өнер ұжымдары қатысты.  

Қали Байжанов атындағы Қарағанды концерттік бірлестігінің «Аққу» фольклорлық-хореографилық ансамблі мен «Арқа сазы» фольклорлық ансамблі «Құстар әні» биін орындап, кештің шымылдығын ашты. Халықаралық, республикалық байқаулардың лауреаты, әнші Ермек Нұрлытаң Нұрғиса Тілендиевтің «Сарыжайлау» әнін орындаса, Жанасыл Елюбаев «Күндер-ай» әнін шырқап, көрермен ықыласына бөленді. Сонымен қатар елорда тұрғындары мен қонақтарына Солтүстік Қазақстан облысынан келген Ақан сері атындағы облыстық филармония өнерпазы Біржан Есжанов «Дариға, домбырамды берші маған» әнін ұсынды.

Ғарифолла Құрманғалиев атындағы Батыс Қазақстан облыстық филармониясының шығармашылық бөлім меңгерушісі Мәди Сабырұлы Нұрғиса Тілендиевтің әндері кез келген тыңдарманның жүрегіне жол табатынын айтты.

«Нұрғиса Тілендиев ағамыздың шығармашылығы халықтың рухын асқақтатуға арналған. Оның музыкасы баланың, ананың, тіпті дананың да жүрегіне жол тауып тұрады. Үлкендердің айтуынша, ол атақ, данқ дегенді іздеген жан емес. Қазақстан композиторлары ішінде тұңғыш рет «Халық қаһарманы» атағын алған. Осылайша халық Нұрғиса ағамен мақтанды. Бұл ұйымдастырылып отырған фестиваль өте жоғары деңгейде өтіп жатыр. Ашылу салтанаты керемет өтті. Осыдан 40 жыл бұрын ағамыздың «Жүрегім менің» әнін орындаған Қазақстанның халық әртісі Майгүл Қазтұрғанова сахнаға шықты. Ол ән арқылы халықтың  жүрегіне мұң салып, бұл әнді тындарман жүрегіне жеткізе білді. Осы фестивальға Батыс өңірі атынан қатысқанымызға өте қуаныштымыз», - деді Мәди Сабырұлы.

Сондай-ақ кеш барысында Нұрғиса Тілендиевтің «Куә бол», «Қайран менің жүрегім», «Балапандарым», «Сағындым ғой», «Есіне мені алғайсың», «Кел еркем, Алатауыңа», «Әлқисса», «Өз елім», «Асыл әжем», «Бауырым-қанатым» әндері шырқалды.

Иса Байзақов атындағы Павлодар облыстық филармониясының шығармашылық жөніндегі басшысының орынбасары Сәуле Мұқаеваның сөзінше, фестиваль өңірлік өнер ұжымдарының тәжірибе алмасуына мүмкіндік беруде.

«Біз Нұрғиса Тілендиевтің 100 жылдығына арналған республикалық фестиваліне «Құстар әнін» дайындап келдік. Бұл әнге заманауи көзқараспен бояу беріп, көрерменге ұсынып отырмыз. Жалпы ауқымды шара өте жоғары деңгейде ұйымдастырылып отыр деп айта аламын. Ол әр өңірден келген кәсіби музыканттардың өнерін тамашалауға және ұжымдар арасындағы  байланысты нығайтуға мүмкіндік беріп отыр. Нұрғиса Тілендиевтің шығармашылығы біз үшін үлкен мұра, оны болашақ ұрпаққа жеткізуге үлесімізді қосамыз деп сенемін», - деді Сәуле Мұқаева.

Кеш барысында «Шымкент концерт» концерттік ұйымының әншісі Жақып Сапарбек өткен ғасырдың 70-ші жылдары жарық көріп, халық арасында кең таралған «Алатау» әнін орындады.

Нұрғиса Тілендиевтің «Құстар қайтып барады» әнін білмейтін жан кемде-кем. Ол кейде «Құстар әні» деп те аталып жүр. Кешегі шығармашылық кешті осы әнмен Иса Байзақов атындағы Павлодар облыстық филармониясының өнерпазы Жібек Айтбаева мен RUH еthnomix ансамблі қорытындылады.  

Еске сала кетейік, ауқымды фестивальді Астана қаласы әкімдігінің Еркеғали Рахмадиев атындағы Мемлекеттік академиялық филармониясы көрнекті композитордың шығармашылық мұрасын кеңінен насихаттау мақсатында ұйымдастырып отыр.