«Әкімді сынаған»: министр желідегі жазбаға не үшін лүпіл басқанын түсіндірді

фото: gov.kz, primeminister.kz

Су ресурстары және ирригация министрі Нұржан Нұржігітов Жамбыл облысының әкімі Ербол Қарашөкеевтің атына сын жазылған әлеуметтік желідегі жарияланымға не үшін лүпіл басқанын айтты, деп хабарлады Elordainfo.kz.

Сенат кулуарында журналистер министрдің жариялымға басқан лүпілі Е.Қарашөкеевтің жұмысына наразы екенін білдіре ме деп сұрады.

«Мен лүпіл басқаным есімде жоқ. Бәлкім, әлеуметтік желіні қарап жатқан кезде кездейсоқ басылған болуы мүмкін. Бірақ ондай теріс пікірім жоқ», - деді министр.

Еске сала кетейік, бұған дейін Жамбыл облысы әкімінің әлеуметтік желідегі жазбасы қызу талқыланған еді. Онда Ербол Қарашөкеевтің жаңа жылдағы 4 күн демалыста екі кітап оқып тастағаны туралы жазылды.