Сарыарқа ауданында қысқы маусымға дайындық жұмыстары аяқталды

Елорданың  Сарыарқа ауданы алдағы қысқы маусымға толық дайындықты аяқтады, деп хабарлады Elordainfo.kz аудан әкімдігінің баспасөз қызметіне сілтеме жасап.

Ауданды қардан тазалау жұмыстарын 20 мердігер ұйым атқарады. Бұл көшелердің қауіпсіздігі мен тазалығын қыстың қиын жағдайларында қамтамасыз етеді. Санитарлық тазалау жұмыстарына 571 арнайы техника мен 739 жол жұмысшысы қатысады. Жұмысшыларға арналған 25 тамақтану және жылыну пункті – дайын. Қардың қалың жаууы жағдайында техниканың саны 585 бірлікке дейін артады. Бұл көшелерді қардан жылдам тазалауға мүмкіндік береді.

«Қарды шығару және сақтау үшін Астрахан тас жолының бойында 53 гектарлық полигон дайындалған. Қар полигонында қауіпсіздік пен тиімділікті арттыру мақсатында бейнебақылау камералары мен самосвал техникасының нөмірлерін тіркейтін жүйе орнатылған. Тұрақты жарықтандыру және үздіксіз электрмен жабдықтау қамтамасыз етілген. Бұған қоса, қар көлемі артқан жағдайда қолдануға болатын қосымша 20 гектарлық резервтік қар полигоны дайын тұр», - деп жазылған аудан әкімдігінің баспасөз қызметі таратқан ақпаратта.